Özbegistan Respublikasynyň Prezidentiniň ýanyndaky Döwlet dolandyryş akademiýasynyň binasynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly kitabynyň özbek dilindäki neşiriniň tanyşdyrylyş dabarasy geçirildi.
Tanyşdyrylyş dabarasyna Özbegistan Respublikasynyň Prezidentiniň ýanyndaky Howpsuzluk Geňeşiniň Sekretarynyň orunbasary, Özbegistan Respublikasynyň Prezidentiniň Daşary syýasy meseleler boýunça ýörite wekili, Türkmenistanyň Hormatly il ýaşulusy Abdulaziz Kamilow, Özbegistan Respublikasynyň Prezidentiniň ýanyndaky Döwlet dolandyryş akademiýasynyň, Ýazyjylar birleşiginiň, Ylymlar akademiýasynyň, Respublikan türkmen medeniýet merkeziniň, ministrlikleriniň ýolbaşçylary, senatorlar we deputatlar, metbugat neşirleriniň baş redaktorlary, Özbegistanyň ýokary okuw mekdepleriniň rektorlary, professor-mugallymlary we talyplary, şeýle-de türkmen diasporasynyň we özbek KHBS-niň wekilleri gatnaşdylar.
Öz çykyşlarynda çärä gatnaşyjylar türkmen halkynyň Milli Lideriniň «Hakyda göwheri» atly kitabynyň özbek dilinde neşir edilmeginiň türkmen-özbek gatnaşyklarynyň hemmetaraplaýyn berkidilýändiginiň, iki halkyň dostlugynyň pugtalanýandygynyň nobatdaky subutnamasy bolup durýandygyny belläp geçdiler.
Şeýle hem 2025-nji ýyl – «Halkara parahatçylyk we ynanyşmak ýylynyň» öňüsyrasynda türkmen halkynyň Milli Lideri, Türkmenistanyň Halk Maslahatynyň Başlygynyň bu eseriniň türkmen halkynyň däp-dessurlaryny öwrenýän giň ylmy jemgyýetçilik üçin özboluşly sowgat bolandygy aýratyn bellenildi.