Özbegistan 2030-njy ýyldan başlap, öndürýän elektrik energiýasynyň artyp galan bölegini Ýewropa eksport etmegi meýilleşdirýär. Bu barada Özbegistanyň energetika ministri Žurabek Mirzamahmudow Astanada geçirilen Merkezi Aziýa döwletleriniň energetika ministrleriniň ilkinji duşuşygynda belläp geçdi.
Özbek ministri bu maksatnamany durmuşa geçirmek üçin Gazagystan we Azerbaýjan bilen gol çekilen Hazar deňziniň düýbünden elektrik kabelini geçirmek baradaky taslamany iş ýüzünde durmuşa ornaşdyrmagyň möhüm bolup durýandygyny aýtdy.
Özbegistan gaýtadan dikeldilýän energiýa çeşmeleriniň alynýan energiýanyň möçberini 2024-nji ýylyň ahyryna çenli 4 gigawatta, 2030-njy ýylda bu görkezijini 20 gigawattdan gowrak derejä çykaryp, onuň 5 gigawattyny Ýewropa eksport etmek göz öňünde tutulýar.
Özbek ministri eksportuň möçberiniň elektrik energiýasyny geçiriji ulgamynyň kuwwatyna hem-de Ýewropanyň sarp edijileriniň zerurlyklaryna bagly bolup durjakdygyny hem belläp geçdi.
Özbegistan elektrik energiýasyny ilki Gazagystana, Hazar deňziniň düýbünden elektrik kabeli bilen Azerbaýjana, soňra bolsa Gruziýa we Gara deňziň düýbünden geçýän kabel bilen Rumyniýa, Wengriýa we Bolgariýa ibermek göz öňünde tutulýar.