Özbegistanyň Prezidenti Şawkat Mirziýoýew Azerbaýjan Respublikasynda döwlet saparynda boldy. 2-4-nji iýul aralygynda amala aşyrylan bu saparyň çäklerinde geçirilen gepleşikleriň netijeleri boýunça iki ýurduň arasyndaky söwdanyň möçberini 1 milliard dollara ýetirmek babatda ylalaşyldy.
Özbegistanyň Prezidenti Şawkat Mirziýoýew Baku şäherinde Azerbaýjan Respublikasynyň Prezidenti Ilham Aliýew bilen duşuşdy. Iki ýurduň arasyndaky syýasy, söwda-ykdysady hem-de medeni-ynsanperwer ugurlaryndaky hyzmatdaşlygyň giň gerimi ara alnyp maslahatlaşyldy.
Şeýle hem iki ýurduň döwlet Baştutanlarynyň gatnaşmagynda Özbegistan-Azerbaýjan ýokary döwletara geňeşiniň mejlisi geçirildi.
Gepleşikleriň jemleri boýunça birnäçe möhüm ylalaşyklara gol çekildi. Şolaryň hatarynda 2025–2026-njy ýyllar üçin senagat hyzmatdaşlygy maksatnamasy hem-de 2030-njy ýyla çenli söwda dolanyşygyny 1 milliard dollara çenli ýokarlandyrmak üçin maksatnama bar.
Iki ýurduň arasyndaky özara söwdanyň möçberi soňky 8 ýylda 7,8 esse artdy we 2024-nji ýylda 253 million dollara deň boldy. Özbegistanyň Azerbaýjana eksporty 7,5 esse artdy we 208 million dollar, import 9 esse artdy we geçen ýyl 45 million dollara barabar boldy.
BAKUDA “ÖZBEGISTAN” SEÝILGÄHI GURLAR
Bu saparyň çäklerinde Baku şäherinde “Özbegistan” seýilgähiniň gurluşygynyň düýbi tutuldy. Şawkat Mirziýoýewiň hem-de Ilham Aliýewiň gatnaşmagynda düýbi tutulan seýilgähiň meýdany 5 gektara deň bolar.
“Özbegistan” seýilgähi giň gerimli medeni we dynç-alyş taslamasydyr. Özbegistanyň baý taryhyny, binagärligini we medeniýetini, şol sanda Daşkent, Samarkant, Buhara, Hywa we Kokand ýaly özboluşly şäherleriň özboluşly binagärligi dörediler. 5 gektar meýdany tutjak seýilgäh Özbegistanyň kartasy görnüşinde gurlar. Şeýle hem muzeý, kinoteatr, amfiteatr, diň, restoran we kafe bolar, bu ýerde Özbegistanyň milli aşhanasynyň nusgalary hödürlener, söwda meýdançasy, ýadygärlik we sowgatlyk dükanlary, haýwanat bagy we myhmanhana bolar. Seýilgähiň esasy binalary Buharanyň, Samarkandyň we Hywanyň binagärlik mysallarynda bolar.