Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň we Türkmenistanyň Daşary işler ministrliginiň Halkara gatnaşyklar institutynyň žurnalistika hünärinde okaýan talyplar 24-27-nji maý aralygynda Ýewropada Howpsuzlyk we Hyzmatdaşlyk Guramasynyň Aşgabatdaky şahamçasynyň guramagynda wideoaragatnaşyk arkaly onlaýn okuw maslahatyna gatnaşdylar.
Okuw maslahatynda žurnalistika boýunça halkara bilermen Marek Bekerman talyplara žurnalistika ugrundan sapak berdi. Žurnalistikanyň taryhy, onuň häzirki döwürdäki ösüşi, sanly ulgamyň esasynda žurnalistikanyň işiniň ýola goýluşy baradaky temalar onlaýn okuw maslahatynyň esasyny düzdi. Okuw maslahatynyň jemleýji gününde oňa gatnaşyjy talyplara ÝHHG-niň Aşgabatdaky şahamçasynyň şahadatnamalary gowşuryldy.
Maksat Taganow,
Magtymguly adyndaky
Türkmen döwlet uniwersitetiniň žurnalistika hünäriniň talyby.