Millionlarça yzarlaýjysy bolan poliglot influenser Ýuji Beleza 2026-njy ýylyň 17-nji martynda Belgiýada geçiriljek “Türkmenistan — bedew batly at-myradyň mekany»” atly çärede çykyş eder. Çäre Türkmenistanyň taryhy, medeniýeti we hemişelik bitaraplyk syýasatyna bagyşlanýar.
Yuji Beleza dünýä belli köp dilli kontent döredijidir. Ol köçede dürli ýurtlardan bolan adamlara olaryň ene dilinde ýüzlenip, garaşylmadyk reaksiýalary görkezýän wideolary bilen meşhurdyr. Onuň esasy maksady — diller arkaly medeniýetleri birleşdirmek we adamlaryň arasynda dostluk köprüsini gurmakdyr. Onuň TikTok hasabyny 9,5 million, Instagram hasabyny bolsa 7,6 million adam yzarlaýar.
2026-njy ýylyň 17-nji martynda Türkmenistanyň Belgiýa Patyşalygyndaky Ilçihanasy Louvain-la-Neuve şäherindäki Katolik Leuven Uniwersitetinde (UCLouvain) talyplar üçin ýörite maglumat duşuşygyny gurar.
Çäräniň ady: “Türkmenistan — bedew batly at-myradyň mekany”.
Maglumat duşuşygyna Türkmenistanyň Ilçisi Sapar Palwanow hem-de dürli dillerde mazmun döredýän, medeniýetleri dil arkaly birleşdirmäge gönükdirilen işi bilen tanalýan köp dilli kontent dörediji we poliglot influenser Ýuji Beleza gatnaşar.
Ilçi talyplara Türkmenistanyň taryhy, garaşsyzlyk ýoluny hem-de häzirki zaman türkmen döwletiniň ösüşini tanyşdyrar. Çykyşda ýurduň taryhy kökleri, garaşsyzlyk tejribesi hem-de Türkmenistanyň daşary syýasatynyň esasy ýörelgeleriniň biri bolup durýan hemişelik bitaraplyk syýasaty barada gürrüň ediler. Bu syýasat sebit durnuklylygyna we halkara dialogyň ösdürilmegine goşant goşýar.
Gatnaşyjylar Türkmenistanyň medeni aýratynlyklary bilen hem tanyşarlar. Şol sanda däp-dessurlaryň ähmiýeti, milli miras hem-de garaşsyzlykdan soň milli özboluşlylygyň pugtalandyrylmagynda türkmen diliniň orny barada maglumat berler.
Çäräniň ikinji bölümi medeniýetleriň arasynda köpri gurmakda diliň güýjüne bagyşlanar. Bu çäkde Ýuji Beleza ene dilinde aragatnaşyk gurmagyň ähmiýeti barada öz garaýyşlaryny paýlaşar hem-de diliň medeniýetleriň arasynda özara düşünişmegi we hormaty ösdürýändigini görkezýän tejribesi barada gürrüň berer.
Maglumat duşuşygynyň maksady talyplara Türkmenistanyň taryhy ösüşi, medeni esaslary hem-de halkara gatnaşyklarynda dialoga we hyzmatdaşlyga bolan çemeleşmesi barada has çuňňur düşünje bermekden ybaratdyr. Şeýle hem çäre talyplara pikir alyşmak we sorag bermek üçin mümkinçilik döreder.
Iňlis dilini öwrenmek isleýänler üçin ygtybarly çeşme: Makul Sözlük