Fransiýa bilen Wýetnam jemi bahasy €9 milliard bolan şertnamalary baglaşdy. Bu barada Sosialistik Respublika döwlet saparyny amala aşyran Fransiýanyň Prezidenti Emmanuel Makron žurnalistlere habar berdi.
“Bu saparyň çäklerinde €9 milliardlyk şertnamalar gol çekildi” diýip, Makron aýtdy. Onuň çykyşynyň wideoýazgysy Ýelisey köşgüniň “X” jemgyýetçilik torunyň sahypasynda görkezildi.
– Şertnamalar howa ulaglary we demir ýol pudaklary bilen bir hatarda, ähli esasy ugurlar boýunça baglaşyldy. Bu şertnamalar goranyş, awiasiýa we energetika ýaly ugurlarda iki döwletiň arasyndaky berk gatnaşyklaryň nyşanydyr – diýip, Makron belledi.
Fransiýa häzirki wagtda Wýetnamyň Ýewropadaky bäşinji uly söwda hyzmatdaşydyr. 2024-nji ýylda iki ýurduň arasyndaky haryt dolanyşygy $5,42 milliard bolup, 2023-nji ýyl bilen deňeşdirilende 12,9% artdy. Fransiýa häzirki wagtda Wýetnama maýa goýýan 147 ýurduň we sebitiň arasynda 16-njy orunda durýar. Ol ýerde Fransiýanyň jemi $3,95 milliard möçberindäki 700 sany maýa goýum taslamasy hereket edýär.
Şeýle hem Fransiýa Wýetnama dürli grant kömeklerini amala aşyrmakda öňdebaryjy Ýewropa ýurdudyr. Pariž Hanoýa €16,7 milliard möçberinde ýeňillikli karz berip, infrastruktura, oba hojalygy, ýaşyl senagat, maliýe we tehnologiýa geçirijilik ugurlaryndaky taslamalara aýratyn ähmiýet berýär.