Russiýanyň daşary işler ministri Sergeý Lawrow Gazagystanyň, Gyrgyzystanyň, Täjigistanyň, Türkmenistanyň we Özbegistanyň ilçileri bilen duşuşdy. Bu barada Russiýanyň daşary syýasat edarasy habar berýär.
Duşuşygyň barşynda Russiýa bilen Merkezi Aziýanyň her bir döwletiniň arasyndaky gatnaşyklara hemmetaraplaýyn syn berlip, taraplar ikitaraplaýyn hem-de GDA, Ýewraziýa ykdysady bileleşigi, Şanhaý Hyzmatdaşlyk Guramasy ýaly halkara guramalaryň çäklerindäki köptaraplaýyn gatnaşyklary ara alyp maslahatlaşdylar.
Taraplar Russiýa bilen Merkezi Aziýa ýurtlarynyň arasyndaky söwda-ykdysady gatnaşyklaryň durnukly ösüşine ýokary baha berip, ylym, bilim we medeni-ynsanperwer ugurdaky gatnaşyklaryň ähmiýetini bellediler.
Şeýle hem howpsuzlyk we sebit durnuklylygy babatda strategik hyzmatdaşlygyň köptaraplaýyn toplumynyň durnukly ösdürilmegini üpjün etmek babatdaky tagallalar beýan edildi.
Mundan başga-da, 2022-nji ýylyň 14-nji oktýabrynda Astana şäherinde geçirilen Merkezi Aziýa+Russiýa formatyndaky ilkinji sammitiň netijelerini durmuşa geçirmek babatda pikir alşyldy.
Duşuşykda suwdan peýdalanmak we Aralyň ekologiýa meseleleri boýunça ylmy-tejribe hyzmatdaşlygyna hem aýratyn üns berildi.