Ýewropanyň öňdebaryjy futbol çempionatlarynda kubok ýaryşlary geçirildi. Germaniýanyň kubogyny gazanmak ugrundaky ýaryşda garaşylmadyk netije bilen tamamlandy.
Ýewropanyň güýçli toparlaryndan hasaplanýan “Bawariýa” topary Germaniýanyň Kubogynyň 1/16 final duşuşygynda ikinji ligada çykyş edýän “Holştaýn Kil” toparyndan ýeňlip, kubok ýaryşyndan çykdy.
Duşuşygyň esasy wagty 2:2 hasabynda tamamlandy. Ýeňiji 11 metrlik jerime urgulary bilen kesgitlendi. Bu ýagdaýda “Holştaýn Kil” topary 6:5 hasabyndan üstünlik gazanyp, bir soňky tapgyra çykdy.
20190-njy we 2020-nji ýyllarda yzly-yzyna bu kubogy gazanyp gelýän “Bawariýa” topary üstümizdäki ýylda hem kubogy gazanmagy göz öňünde tutýardy. “Bawariýa” topary 17 ýyldan soňra ikinji liganyň toparyna ýeňildi.
“BARSELONA” ÜÇIN FINALA ÇYKMAK ÝEŇIL BOLMADY
Ispaniýanyň Superkubogynyň ýarym final duşuşygynda “Barselona” bilen “Real Sosýedad” toparlary duşuşdy. Lionel Messi bu gezek topar ýoldaşlaryna kömek berip bilmedi. Ol şikesi sebäpli duşuşyga gatnaşmady.
Messiniň ýoklugynda “Barselona” ýeňiş gazanmak ýeňil bolmady. Duşuşygyň esasy wagty 1:1 hasabynda tamamlandy. 11 metrlik jerime urgularyndan soňra “Barsleona” ýeňiş gazanyp, Ispaniýanyň Superkubogynyň finalynda oýnamaga mümkinçilik aldy. Katalon toparynyň derwezebany Mark-Andre ter Ştegen 2 pökgüniň derwezä girmegine rugsat bermedi.
Şeýlelikde, “Barselona” 1998-nji ýyldan soň, ilkinji gezek şeýle ýaryşlarda 11 metrlik jerime urgusy arkaly bir soňky tapgyra çykmagy başardy.
POÇETTINONYŇ ILKINJI KUBOGY
Golaýda Fransiýanyň “PSŽ” toparynyň tälimçiligine bellenen Maurusio Poçettino täze topary bilen ilkinji kubogyny gazandy. Fransiýanyň Superkubogynyň finalynda “PSŽ” topary “Marsel” toparyny 2:1 hasabyndan utdy.
“PSŽ” topary bassyr 8-nji gezek bu arzyly kubogy gazanyp gelýär. Bu gezekki duşuşykda braziliýaly Neýmaryň hem meýdançada bolmagy topar üçin uly şatlykly waka boldy. Ol şikesli bolandygy üçin duşuşyklara gatnaşman gelýärdi. Neýmaryň duşuşygyň ahyryky minutlarynda 11 metrlik jerime urgusyny dürs ýerine ýetirmegi topara naýbaşy kubogy gazanmaga mümkinçilik berdi.
Siz habarlar saýtymyza girilen dessine Size bildiriş gelmegini isleýän bolsaňyz onda “Atavatan Türkmenistan” halkara žurnalynyň www.atavatan-turkmenistan.com saýtynyň ýakynda hyzmata giren Android ulgamynda işleýän Applikasyýasyny şu ýere basyp ýa-da aşakdaky suratyň üstine basyp öz telefonyňyza ýükläp alyň! Eger Siz bu habary kompýuteriň üsti bilen okaýan bolsaňyz, el telefonyňyzyň Google Plaý dükanyndan “Atavatan Turkmenistan” ýazyp biziň Applikasyýamyzy indirip mugt alyp bilersiňiz!
