Angliýanyň “Kristal Pelas” toparynyň futbolçylary UEFA-nyň Konferensiýa ligasynyň final duşuşygynda Ispaniýanyň “Raýo Walekano” toparyny 1:0 hasabynda ýeňmegi başardy. Şeýlelikde, iňlis topary 120 ýyllyk taryhynda ilkinji gezek Ýewropanyň kubogynyň eýesi boldy.
Final duşuşygy Leýpsig şäherinde geçirildi. Oýnuň ýeke-täk goluny 51-nji minutda Žan-Filip Mateta öz adyna ýazdyrdy.
Konferensiýa ligasy – Çempionlar ligasyndan we Ýewropa ligasyndan soňra Ýewropanyň klub derejesindäki üçünji möhüm ýaryşydyr.
Konferensiýa ligasy 2021-nji ýylda döredildi. Geçen möwsümiň finalynda Londonyň “Çelsi” topary Ispaniýanyň “Betis” toparyny uly hasap bilen (4:1) utdy. Şeýle hem, iňlis klublarynyň arasyndan 2023-nji ýylda “West Hem” bu bäsleşikde ýeňiji bolupdy. Mundan başga-da, Italiýanyň “Roma” (2022) we Gresiýanyň “Olimpiakos” (2024) toparlary hem bu ýaryşyň çempiony bolmagy başardylar.
Ýewropa ligasynyň ýenijisi eýýäm mälim boldy: 20-nji maýda geçirilen final duşuşygynda Angliýanyň “Aston Willa” topary Germaniýanyň “Fraýburg” toparyny uly hasap bilen (3:0) utdy.
30-njy maýda bolsa UEFA-nyň Çempionlar ligasynyň finaly bolar: onda Fransiýanyň “Pari Sen-Žermen” we Angliýanyň “Arsenal” toparlary özara güýç synanyşarlar.