“Intellekt Bonus” ýagny, zehin bilen bonus pul ýygnap we iň köp bonus ýygnan gatnaşyja ýeňiji bolmak mümkinçiligi berilýän täze bäsleşik başlaýar. “Atavatan TV” YouTube kanalynda tomaşaçylara ýetiriljek täze bäsleşikde her hepdede ýeňijiniň pul gazanmagyna mümkinçilik berilýär. Hepdäniň ýeňijisi şol bir wagtda final bäsleşigine gatnaşmak hukugyna eýe bolýar. Täze bäsleşik “Atavatan Türkmenistan” halkara žurnalynyň täze intellektual başlangyjydyr.
Bäsleşige gatnaşmaga isleg bildirýänler www.atavatan-turkmenistan.com saýtyndaky şu ýerde berilýän (https://www.atavatan-turkmenistan.com/intellekt-bonusy/) anketany doldurmaly we bize onlaýn ugratmaly. Bäsleşige gatnaşmak üçin iň aşaky ýaş çägi 18 diýip kesgitlenilýär we 18 ýaşyny dolduran her bir raýat anketany doldurmak hukugyna eýedir. Biziň döredijilik toparymyz siziň bize iberen maglumatlaryňyzy öwrener we ilkinji saýlama işlerini geçirer.
Kimler saýlansa, olar kastinge çagyrylýar. Kasting netijesinde saýlanan 4 adam ilkinji tapgyra gatnaşýar. Kastinge çagyrylýanlaryň onuň ýaryş üçin saýlanandygyny aňlatmaýar. Bäsleşik jemi 4 tapgyrdan ybarat we her bir tapgyryň ýeňijisi hem pul baýragyny gazanýar hem-de final tapgyra gatnaşmak hukugyna eýe bolýar. Her möwsümde jemi 16 gatnaşyjy ýaryşýar. Bäsleşigiň ýazgysy Aşgabat şäherinde geçirilýär. Ýaryşa gatnaşmak mugt we hiç hilli gatnaşmak üçin töleg tölenmeýär, emma gatnaşyjynyň biziň ýazgy edilýän ýerimize gelmek bilen baglanyşykly ähli çykdajylary özüne degişlidir.
Tapgyrlarda işler nähili alnyp barylýar?
Bäsleşigiň her bir tapgyrynda jemi 50 sorag bar we her bir gatnaşyjy 1-den 50-ä çenli sany özi saýlaýar we üsti ýapyk sorag açylýar. Soragda 4 jogap bar we gatnaşyjy 30 sekundyň dowamynda dogry jogaby biljek bolmaly. Eger dogry jogaby bilmese, 0, bilen ýagdaýynda 100 manatlyk bonus gazanýar. Nobat indiki gatnaşyja geçýär , şeýlelikde, nobatma-nobat her bir gatnaşyja 6 sorag soralýar. Her bir nobatda bonusyň möçberi artýar. Ýagny, 1-nji soragyň dogry jogabyny bilen gatnaşyjy 100 manat, ikinji soragyň jogabyny bilen 200 manat, üçünji soragyň jogabyny bilen 300 manat, dördünji soragyň jogabyny bilen 400 manat, bäşinji soragyň jogabyny bilen 500 manat, 6-njy soragyň, ýagny, iň soňky soragyň jogabyny bilen 600 manat bonus gazanýar.
Altynjy soragdan soňra ähli bonuslar sanalýar we iň köp bonusy gazanan ýeňiji bolýar we jemlän bonusyň garşylygynda pul baýragyny alýar. Beýleki gatnaşylaryň bonuslary bolsa nollanýar. Mysal üçin, haýsyda bolsa bir gatnaşyjy ähli soraglaryň jogabyny bilse, jemi 2100 manat gazanýar. (100+200+300+400+500+600=2100)
Eger 2 we ondan köp gatnaşyjynyň bonuslary deň bolsa, (ýokary bonus gazananlaryň arasynda) onda bäsleşik bonuslary deň bolanlaryň arasynda dowam edýär we beýlekileriň bonuslary nollanýar we bäsleşikden çekilýär. Bu ýagdaýdan soňra her bir dogry jogabyna 100 manatlyk bonus berilýär. Her bir soragyň dogry jogaby berip bilmedik ýaryşdan çetleşdirilýär we bonuslary nollanýar we bäsleşik diňe ýeke ýeňiji galýança dowam edýär. Şeýlelikde, her tapgyryň ýeke ýeňijisi bolýar we beýlekileriň bonuslary nollanýar.
Final tapgyry
Şeýlelikde, bäsleşigiň her tapgyrynyň ýeňijisi ýokaryda hem belläp geçişimiz ýaly, final tapgyra gatnaşmak hukugyna hem eýe bolýar. Jemi 4 tapgyr tamamlandan soňra her bir tapgyryň ýeňijisi bolan 4 ýeňiji final tapgyra gatnaşýar. Final tapgyrda hem jemi 6 sorag berilýär. Emma final tapgyrda her bir soragyň bonusy has köp möçberde bolýar. Has takygy 1-nji soragyň bonusy 300 manat, ikinji soragyň 600 manat, üçünji soragyň 900 manat, dördünji soragyň 1200 manat, bäşinji soragyň 1500 manat, 6-njy, ýagny iň soňky soragyň bonusy 1800 manat bolýar. Şeýlelikde, ähli soraglary dogry bilen jemi 6300 manat gazanmak mümkinçiligine eýe bolýar. Eger bonuslaryň sany deň bolsa, onda, ýaryş olaryň arasynda dowam edýär we beýlekileriň bonuslary nollanýar. Final tapgyrda bu ýagdaýdan soňra her bir soragyň bonusy 300-den artmaga başlaýar. Mysal üçin, iň köp bonus gazanan 2 gatnaşyjynyň final tapgyrda ballary deň bolsa, onda ýaryş bularyň arasynda dowam edýär we her bir dogry jogap üçin 300 bonus berilýär. Diýeliň, ýene-de 10 soraga çenli her iki gatnaşyjy hem ähli soragy bilse, onda bularyň bonuslary 9300 bonusa ýetýär. Eger mysal üçin 11-nji soragyň jogabyny biri bilip, beýleki bilmese, bilen 9600 manat gazanýar, beýlekiniň bonuslary nollanýar. Şeýlelikde, final tapgyrynyň ýeňijisi kesgitlenýär.
Intellektual bäsleşik her hepdäniň şenbe güni sagat 22:00-da . “Atavatan TV” YouTube kanalynda tomaşaçylara ýetiriler. Bäsleşik diňe bir gatnaşyjylara däl, eýsem tomaşaçylara hem gyzykly wagt geçirýän wagty täze maglumatlary öwrenmek mümkinçiligi berýän taslama bolar. Ýagny “Intellekt Bonus” bäsleşigi hem gyzykly hem-de peýdaly bolar!
Habarlaşmak üçin: 862 88 02 63