Hindistanyň günortasyndaky Tamilnad ştatynyň Tulasendrapuram obasynyň ýaşaýjylary ABŞ-nyň wise-prezidenti Kamala Harrisiň prezident saýlawlarynda üstünlik gazanmagy üçin dileg ederler. Bu barada Hindistanyň “NDTV” teleýaýlymy habar berýär. Bu obada Kamala Harrisiň ejesi tarapyndan ata-babalary ýaşapdyr.
“Sişenbe güni irden ybadathanada ýörite ybadat çäresi geçiriler” – diýip, Manikandan obasynyň ýaşaýjysy belläp geçdi. Onuň bellemegine görä, Harris ýeňiş gazanan halatynda baýramçylyk bellener.
Ybadathanada Harrisiň we onuň atasynyň ady üçin ýörite daşa oýulyp nagyş edilipdir. Ýerli ýaşaýjylar onuň ABŞ-nyň ilkinji zenan prezident boljakdygyna ynanýarlar.
Tulasendrapuram obasy Waşingtondan 13 müň kilometr uzaklykda ýerleşýär. Bu oba 4 ýyl mundan ozal, 2020-nji ýyldaky saýlawlarda Demokratik partiýasynyň ýeňiş gazanmagy üçin gurnan ybadat çäräsi bilen tanaldy. Soňra Harrisiň ABŞ-nyň wise-prezidenti wezipesine kasam kabul edilen gününi baýramçylyk hökmünde belledi.
Kamala Harrisiň ata-babalary Tamilnadda ýaşapdyrlar hem-de gurply maşgala bolupdyrlar. Onuň ejesi Şýama Gopalan Çenaý şäherinde Pi wi Gopalanyň maşgalasynda dünýä inipdir. Onuň hem kakasy gurply bolandygy üçin Şýamany ABŞ-a okuwa ugradypdyr. Şol ýerde hem ol Ýamaýkadan ABŞ-a göçüp gelen Donald Harris bilen durmuş gurýar. Bu jübütden Kamala Harris dünýä inýär. Şonuň üçin Günorta Hindistan ABŞ-nyň wise-prezidentini özüniňki haspalaýar we onuň hormatyna dürli ybadat çärelerini gurnaýar.
Hukuk bölümini tapawutly tamamlan Kamala Harris köp ýyllaryň dowamynda San-Fransiskoda prokuror bolup işledi. 2010-njy ýylda Kaliforniýa ştatynyň ilkinji zenan baş prokurory bolupdy.
Şu gün 5-nji noýabrda ABŞ-da 60-njy gezek Prezident saýlawlary geçiriler. Bu saýlawlarda döwlet baştutany wezipesi üçin Respublikan partiýasyndan Donald Tramp, Demokratik partiýasyndan Kamala Harris bäsleşýär. Tramp 2017-2021-nji ýyllarda ABŞ-nyň 45-nji prezidenti bolupdy.