Ertir, dünýä jemgyýetçiliginiň köpden bäri garaşyp oturan syýasy-jemgyýetçilik wakasy – ABŞ-daky prezident saýlawlary geçiriler. Saýlawlar üçin wagtyndna öň geçirilen ses berlişige rekord derejede saýlawçy gatnaşdy. 78 milliondan gowrak ABŞ-nyň raýaty wagtyndan öň sesini berdi. Bu barada Florida ştatynyň uniwersitetiniň ýekşenbe güni agşam beren maglumatynda beýan edilýär.
Maglumata görä, 42,6 million saýlawçynyň hut özi saýlaw uçastogyna baryp sesini berdi. Galan 35.3 milliona golaýy bolsa poçta arkaly ses berdi.
ABŞ-da hasaba alnan saýlawçylaryň umumy sany 168 milliona deňdir. Wagtyndan öň ses berişlik döwründe Tehasyň raýatlary has köp işjeňlik görkezdi. Bu ştatdan 8.9 million saýlawçy ses berdi. Şeýle hem Floridada 8.1 million, Kaliforniýada 7.6 million, Demirgazyk Karolinada 4.4 million we Jorjiýada 4 million saýlawçy sesini berdi.
Ýurtda ertir prezident saýlawlary geçiriler. Bu saýlawlarda döwlet baştutany wezipesi üçin Respublikan partiýasyndan Donald Tramp, Demokratik partiýasyndan Kamala Harris bäsleşýär. Tramp 2017-2021-nji ýyllarda ABŞ-nyň 45-nji prezidenti bolupdy.
2020-nji ýylda geçirilen saýlawlarda ol ýurduň häzirki Prezidenti Jo Baýdenden ýeňlipdi. Aslynda ilki bilen Jo Baýden dalaşgär görkezilipdi, ýöne ol dalaşgärlikden çekilenden soňra onuň ýerine wise-prezident Kamala Harris dalaşgär boldy.
Harris 2021-nji ýylyň ýanwaryndan bäri wise-prezident wezipesini alyp barýar.
Ertirki geçiriljek prezident saýlawlaryndan soňra täze saýlanan Prezidenti 2025-nji ýylyň 10-njy ýanwarynda kasam kabul edip, wezipesine girişer.