Şu gün — 7-nji fewralda Türkmenistanyň Jemgyýetçilik guramalarynyň merkezi binasynda, Türkmenistanyň Prezidentiniň Kararyna laýyklykda, Halkara zenanlar güni mynasybetli ýurdumyzda sekiz we şondan hem köp çagany dünýä inderip, terbiýeläp ýetişdiren enelere «Ene mähri» ady dakylyp, onuň nyşany gowşuryldy.
Şu ýyl bu belent ada dürli kärlerde zähmet çekýän eneleriň ýüzlerçesi mynasyp boldy. Şu mynasybetli guralan dabarada şeýle ada mynasyp bolan enelere hormatly Prezidentimiziň adyndan ter gül çemenleri, gymmat bahaly sowgatlar gowşuryldy. Eneler, gelin-gyzlar barada edýän aladalary üçin Arkadagly Serdarymyza, Gahryman Arkadagymyza ýürekleri arzuwdan doly zenanlarymyzyň hoşallyklarynyň çägi ýok.
Sekiz we şondan köp çagany dünýä inderen hem-de terbiýeläp ýetişdiren enelerimiziň uly toparyna hormatly Prezidentimiziň Permany bilen Türkmenistanyň “Ene mähri” diýen hormatly atlaryň dakylmagy, şeýle-de bu bagtyýar maşgalalaryň birnäçesine döwrebap ýaşaýyş jaýlarynyň açarlarynyň gowşurylmagy ýaz göwünli mähribanlarymyzyň baýramçylyk ruhubelentligini goşalandyrdy.
Ozal hem habar berşimiz ýaly, mähriban eneleriň 285-si «Ene mähri» adyna mynasyp boldular.