Gazagystanyň Al-Farabi milli uniwersitetiniň 90 ýyllygy mynasybetli TÜRKSOÝ halkara guramasy bilen bilelikde 29-30-njy aprelde Farabi film festiwaly geçirildi. Oňa Türkmenistanyň kinematograflary hem gatnaşdy.
Bu film festiwalynda Oguzhan adyndaky “Türkmenfilm” birleşiginiň ýaş režissýory Isgendermuhammet Annamuhamedowyň surata düşüren “Dutaryň owazy” çeper filmi kino muşdaklara görkezildi. Film kino muşdaklarda uly täsir galdyrdy we kinofestiwalyň emin agzalarynyň ýörite baýragyna mynasyp boldy.
“Dutaryň owazy” filmi kino tomaşaçylara türkmen halkynyň saz sungaty babatda maglumat almaga giň mümkinçilik döretdi.
Mundan ozal, bu film Belarusda geçirilen “Listapad” we türki dünýäsiniň “Gorkut ata” kinofestiwallarynda görkezildi.
Mälim bolşy ýaly, türki dünýäsiniň “Gorkut ata” kinofestiwaly üstümizdäki ýylda Türkmenistanda geçiriler.