Halkara futbol federasiýasy (FIFA) 2022-nji ýylda Katarda geçiriljek futbol boýunça dünýä çempionatynyň resmi futbol pökgüsini tanyşdyrdy. Bu barada FIFA-nyň metbugat gullugy habar berýär.
– Bu “Adidas” kompaniýasy tarapyndan öndürilen çydamly we ýokary hilli resmi futbol topy hemmeleri haýran galdyrdy. Ol Katardaky stadionlardaky ähli uly ýaryşlarda ulanylar – diýip, FIFA-nyň marketing boýunça direktory Žan-Fransua Pati gürrüň berdi.
“Adidas” tarapyndan taýýarlanan bu futbol topy dünýäniň onlarça ýurdunda tanyşdyrylar. Bu kompaniýa ozal 13 dünýä çempionatynyň futbol topuny taýýarlady.
Katardaky çempionatyň topy “Al Rihla” diýlip atlandyryldy. Ol terjime edilende “syýahat” diýen manyny berýär.
Dünýä çempionatynyň bijeleri 1-nji aprelde geçiriler. Häzirki wagtda çempionata gatnaşjak 32 milli ýygyndynyň 27-si belli boldy.
Katardaky dünýä çempionaty 21-nji noýabr-18-nji dekabr aralygynda geçiriler.