Garyşyk söweş sungaty boýunça türkmenistanly türgen Döwletjan Ýagşymyradow “Bellator 277” ýaryşynyň çäklerinde nobatdaky tutluşygyna çykýar. Onuň bu tutluşygy 15-nji aprelde Toni Jonsona garşy bolar. Bu barada “Sports Illustrated” neşiri habar berýär.
32 ýaşyndaky Döwletjan Ýagşymyradow ýarym agyr agramda “Berkut” ýaryşynyň absolýut çempiony, “Ahmat” ýaryşynyň absolýut çempiony bolan türgen.
Ol “Bellator” ýaryşynyň çäklerinde geçiren 2 tutluşygynda hem ýeňlişe sezewar boldy. Kori Anderson Ýagşymyradowy 2021-nji ýylyň aprelinde ýeňipdi. Döwletjan Ýagşymyradow geçen ýylyň oktýabr aýynda Karl Albrektssona garşy tutluşykda şowly çykyş eden hem bolsa, eminleriň çözgüdi bilen ýeňildi.
Döwletjan Ýagşymyradowyň hem çykyş etjek güni, ýagny 15-nji aprelde “Bellator” ýaryşynda Gran-pri bäsleşiginiň finaly bolar. Onda ýarym agramda “Bellator” çempiony Wadim Nemkow bilen Kori Anderson duşuşar. “Bellator” ýaryşynyň çempiony ady almak ugrundaky final tutluşygyň pul baýragy 1 million dollara barabardyr.