Argentinanyň we dünýä futbolynyň taryhyna adyny altyn harplary bilen ýazdyran Diego Armando Maradona 1960-njy ýylyň 30-njy oktýabrynda Buenos-Aýres şäherinde doguldy we dünýä belli oýunçy şu gün 60 ýaşyny belleýär. Milli ýygyndyda-da we topar karýerasynda-da hereketleri we zehini bilen saýlanan Maradona 9 ýaşynda futbol karýerasyna “Estrella Roja” toparynda başlaýar.
Soňra 16 ýaşyna ýetmänkä eýýäm professional şertnama baglaşýar. Diego Maradona üstünlikli karýerasy 1982-nji ýylda “Boka Huniors” toparynda başlaýar. Bir möwsüm bu toparda çykyş edip, soňra Ispaniýanyň ägirt toparlaryndan biri bolan “Barselona” toparyna transfer bolýar. Kataloniýa topary şol wagt Maradona üçin iň ýokary şertnama hökmünde 5 million ýewro töleýär. “Barselona” toparynda iki möwsümi geçiren argentinaly ýyldyz “Copa Del Reý”, Ispaniýanyň Super kubogyny gazanýar, ýöne toparyň ýolbaşçysy bilen oýunçynyň arasynda düşünişmezlikler ýüze çykyp, Maradona Italiýanyň “Napoli” topary bilen 6,9 million funt-sterling möçberinde şertnama baglaşýar.
Diego Maradona “Napoli” toparynyň janköýerlerinde uly ynam döretdi. 1987-1988 möwsüminde Italiýanyň iň köp gol geçiren oýunçysy boldy we topar bilen Italiýanyň kubogyny, Italiýanyň Super kubogyny we UEFA Ýewropa ligasynyň çempiony we iki gezek Italiýa ligasynyň çempiony bolmagy başardy.
1986-njy ýylda dünýä çempionatynda Argentina milli ýygyndysy bilen ýeňiji boldy. Onuň finalda Angliýa futbol milli ýygyndysyna eli geçiren goly, “Taňrynyň eli” diýip atlandyryldy. “Napoli” futbol toparyndan soňra “Sewilýa” we “Old Boýs” toparlarynda çykyş etdi, özüniň futbol karýerasyny bolsa 1997-nji ýylda “Boka Huniors” topary bilen tamamlady. Diego Armando Maradona 2008-nji ýylda Argentina milli ýygyndysyna tälimçi bellendi. 2010-njy ýyldaky dünýä çempionatynyň çärýek finalynda Argentina, Germaniýa futbol milli ýygyndysynda 4-0 hasabynda utuldy we Maradona şondan soňra işden çekildi. Argentinaly ýyldyz, 2019-nji ýylyň möwsüminde ýolbaşçylyk eden Argentinanyň “Gimnasia de La Plata” toparynyň dolandyryjysy bolmagyny dowam etdirýär.
Telekeçilik bilen meşgullanmak isleýän ýaşlaryň we telekeçileriň söýgüli sahypasy-Telekeçilik Sahypasy!
