UEFA-nyň Çempionlar ligasynyň 1/4 final duşuşyklarynyň nobatdaky oýunlary geçirildi. Bu gezek geçen ýylyň Çempionlar ligasynyň ýeňijisi Germaniýanyň “Bawariýa” toparyna Fransiýanyň “PSŽ” toparyny ýeňmek başartmady. German toparynyň meýdançasynda geçirilen duşuşygy parižliler 3:2 hasabynda utdy.
Ösüp gelýän ýaş ýyldyz Kilian Mbappe Fransiýanyň “PSŽ” toparynda çykyş etmek bilen Çempionlar ligasynyň şu möwsümiň şasyna öwrüldi. Ol mundan ozalky tapgyrda Ispaniýanyň “Barselona” toparyny ýeňmekde hem toparyna uly goşant goşdy.
Bu gezek hem ol Germaniýanyň “Bawariýa” toparynyň derwezesinden 2 gol geçirip, toparynyň ýeňşinde uly paýa eýe boldy. Duşuşykda fransuz toparyndan Kilian Mbappe (2) hem-de Markinos tapawutlandy. German toparyndan bolsa Şupo-Moting bilen Müller tapawutlandy.
Geçen tapgyrda Italiýanyň “Ýuwentus” toparyny ýeňmegi başaran Portugaliýanyň “Porto” topary bu gezek öz meýdançasynda Angliýanyň “Çelsi” toparyndan 2:0 hasabynda ýeňildi. Iňlis toparynyň gollaryny Maýson Maunt bilen Çiluell öz adyna ýazdyrdy.
Bu oýunlaryň jogap duşuşyklary 13-nji aprelde geçiriler.