2025-nji ýylyň 18-nji noýabrynda “Halkara Parahatçylyk we Ynanyşmak” ýylynyň çäklerinde we Türkmenistanyň bitaraplygynyň 30 ýyllygy bilen baglylykda, Türkmenistanyň Gyrgyz Respublikasyndaky Ilçihanasy J.Balasagyn adyndaky Gyrgyz Milli Uniwersitetinde maslahat geçirdi.
Konferensiýa uniwersitetiň professor-mugallymlary we talyplary gatnaşdy. Şeýle hem Azerbaýjan Respublikasynyň Döwlet Pedagogik Uniwersitetiniň, Özbegistan Respublikasynyň Ş.Raşidow adyndaky Samarkant Döwlet Uniwersitetiniň, Samarkant şäherindäki “Ýüpek Ýoly Halkara Syýahatçylyk we Medeni Miras Uniwersitetiniň”, Gazagystan Respublikasynyň Al-Farabi Milli Uniwersitetiniň we Gyrgyz Respublikasynyň K.Ş.Toktomamatow adyndaky Halkara Uniwersitetiniň wekilleri hem wideokonferensiýa arkaly maslahata goşuldylar.
Çäräniň dowamynda Türkmenistanyň başlangyjy bilen yglan edilen “Halkara Parahatçylyk we Ynanyşmak” ýylynyň ähmiýeti, şeýle hem bitarap döwlet hökmünde Türkmenistanyň dünýäniň dürli ýurtlary bilen ösdürýän özara peýdaly gatnaşyklarynyň ähmiýeti nygtaldy. BMG-niň Baş Assambleýasy tarapyndan üç gezek ykrar edilen Türkmenistanyň hemişelik bitaraplyk statusynyň garaşsyzlykdan bäri ýurduň iň möhüm üstünlikleriniň biridigi we onuň parahatçylyk söýüji daşary syýasaty alamatlandyrýandygy bellenildi.
Çykyş edenler Türkmenistanyň Prezidentiniň ýolbaşçylygynda syýasy, ykdysady, medeni we sosial ulgamlarda Türkmen döwletiniň gazanan möhüm üstünliklerini belläp geçdiler. Şeýled maslahatyň dowamynda Halkara hyzmatdaşlygyny ösdürmekde we parahatçylyk hem-de özara ynam ýörelgelerini öňe sürmekde ýurduň işjeň ornuna aýratyn üns berildi.
Beýik şahyr Magtymguly Pyragynyň döredijiligi bilen “Halkara Parahatçylyk we Ynanyşmak” ýylynyň ideýalarynyň arasyndaky baglanyşyk barada aýratyn nygtaldy. Maslahata gatnaşyjylar onuň şygryýetiniň dostluga, doganlyga we ynsanperwerlige çagyrýandygyny bellediler. Çäräniň dowamynda Türkmenistan barada wideoýazgy görkezildi we ýurduň baý medeni mirasyny görkezýän sergi guraldy.