Şu gün Türkmenistanyň Maliýe we ykdysadyýet ministrliginde möhüm ylalaşyga gol çekmek dabarasy boldy. Bu barada “Watan” habarlar gepleşiginde bellenilip geçildi.
Türkmenistanyň Maliýe we ykdysadyýet ministrligi, Türkmenistanyň Senagatçylar we telekeçiler birleşmesi we Beýik Britaniýanyň “JCB Sales Limited” kompaniýasynyň arasynda özara düşünişmek hakyndaky ähtnama gol çekildi.
Bu resminama maliýe we ykdysadyýet ministri Muhammetgeldi Serdarow, TSTB-niň ýolbaşçysy Döwran Hudaýberdiýew hem-de Beýik Britaniýanyň ýurdumyzdaky ilçihanasynyň işleri wagtlaýyn ynanylan wekili Alan Haýton gol çekdi.
Şeýlelikde, TSTB öz agzalary üçin “JCB” kompaniýasynyň önümlerini satyn almaga gyzyklanýandygyny tassyklady. Ýurdumyzyň işewürlik pudagynyň ösüşini goldaýan ministrlik, iňlis kompaniýasy bilen ýurdumyzyň hususy pudagynyň arasyndaky işewür gatnaşyklaryň ösdürilmegine ýakyndan ýardym berer.
Bu resminama Beýik Britaniýanyň tehnikasyny we tehnologiýasyny satyn almak boýunça goşmaça şertnamalary baglaşmak üçin oňyn gepleşikleriň dowam etdirilmegine itergi berer.