Stanislaw Çepurnoý Belarus Respublikasynyň Türkmenistandaky Adatdan daşary we Doly ygtyýarly ilçisi wezipesine bellendi. Bu barada ýurduň Prezidenti Aleksandr Lukaşenko degişli karara gol çekdi.
Mundan ozal, Stanislaw Çepurnoý Belarus Respublikasynyň Ministrler Kabinetiniň Diwanynyň halkara hyzmatdaşlyk we söwda müdirliginiň başlygy wezipesini alyp barýardy.
Täze bellenen ilçi žurnalistler bilen söhbetdeş bolup, onda Belarus bilen Türkmenistanyň arasyndaky hyzmatdaşlyk gatnaşyklarynyň özara hormat goýmak hem-de hyzmatdaşlyk ýörelgelerine esaslanyp ösdürilýändigini belledi.
– Häzirki wagtda halkara guramalaryň çäklerinde oňat gatnaşyklar bar. Pandemiýa sebäpli wagtlaýyn togtadylan gatnaşyklar bilim, medeniýet we sport ulgamynda ösdürilýär. Ylym we tehnologiýa babatda hökümetara topary hereket edýär – diýip, ilçi belledi.
Prezident Lukaşenkonyň Türkmenistan bilen söwda-ykdysady gatnaşyklary ösdürmegiň zerurdygyny belledi. Ilçi senagat, oba hojalygy we ulag ulgamynda hyzmatdaşlygy ösdürmäge giň mümkinçilikleriň bardygyny belledi.
Häzirki wagtda Söwda-ykdysady boýunça hökümetara toparynyň nobatdaky mejlisini geçirmegiň möhletini kesgitlemek üçin gepleşikleriň geçirilýändigini bellän ilçi belarus tarapynyň Türkmenistan bilen hemmetaraplaýyn hyzmatdaşlygy ösdürmäge taýýardygyny belledi.
Ilçi göni howa gatnawlaryň hereket edýändigini, “Belawia” kompaniýasynyň Minsk-Tükrmenbaşy ugry boýunça yzygiderli gatnawlary amala aşyrýandygyny aýtdy.
Diplomat ynsanperwer ugurly hyzmatdaşlyk barada durup geçip, Türkmenistanyň raýatlarynyň Belarusyň uniwersitetlerinde bilim almaga uly isleg bildirýändigini aýtdy we pandemiýadan öň Belarusda bilim alýan türkmen talyplarynyň sanynyň 10 müňe ýetendigini, häzirki wagtda 4 müň talybyň bilim alýandygyny belläp geçdi.
Stanislaw Çepurnoý 2019-njy ýylyň oktýabryndan bäri Belarusyň Türkmenistandaky ilçisi wezipesinde işleýän Wýaçeslaw Beskostonyň ornuna geçer.