ABŞ-nyň Prezidenti Jo Baýden Birleşen Milletler Guramasynyň Baş Assambleýasynyň Nýu-Ýork şäherinde öz işine başlan 78-nji mejlisiniň çäklerinde Merkezi Aziýanyň – Gazagystanyň, Gyrgyz Respublikasynyň, Täjigistanyň, Türkmenistanyň we Özbegistanyň Baştutanlary bilen duşuşar. Bu barada ABŞ-nyň Prezidentiniň milli howpsuzlyk boýunça kömekçisi Jeýk Salliwan habar berdi.
– Prezident Baýden Merkezi Aziýanyň 5 döwletiniň Prezidentleri bilen duşuşar – diýip, Salliwan belläp geçdi. Onuň aýtmagyna görä, bu döwlet Baştutanlary derejesindäki ilkinji duşuşyk bolar.
– Bu birinji sammit liderlere birnäçe ugurlarda – hususan-da sebit howpsuzlygy, söwda, özara gatnaşyklar, howanyň üýtgemegi, kanunçylyk ulgamyndaky hyzmatdaşlyklary ara alyp maslahatlaşmaga mümkinçilik döreder – diýip, ABŞ-nyň Prezidentiniň milli howpsuzlyk boýunça kömekçisi belläp geçdi.
Duşuşygyň jemleri boýunça bilelikdäki beýannamanyň kabul edilmegine garaşylýar we onda hyzmatdaşlyk etmegiň ugurlaryny kesgitlemek göz öňünde tutulýar.
Salliwanyň bellemegine görä, Baýden Nýu-Ýorkda BMG-niň Baş sekretary Antoniu Guterriş bilen hem duşuşyp, onuň bilen birnäçe hyzmatdaşlyk ugurlaryny ara alyp maslahatlaşar.
Şeýle hem Baýden dünýäniň dürli döwletleriniň Baştutanlarynyň gatnaşmagynda geçirilýän hem-de däbe öwrülen kabul edişlige hem gatnaşar.
Mundan başga-da, Baýdeniň Braziliýanyň Prezidenti Luis Inasiu hem-de Ysraýylyň Premýer-ministri Binýamin Netanýahu bilen hem duşuşyklary meýilleşdirilýär.