Türkmenistanyň Telewideniýe, radiogepleşikler we kinematografiýa baradaky döwlet komitetiniň başlangyç hünär okuw mekdebinde «Açyk gapylar» güni geçirildi. Açyk gapylar güni mynasybetli okuw mekdebine mekdep okuwçylary, şeýle-de köp sanly myhmanlar geldiler. Bu okuw mekdebiniň “Açyk gapylar” gününiň dabarasynyň ýörite myhmanlary hem boldy. Olar “Atavatan Türkmenistan” halkara žurnaly hem-de “Makul Hyzmat” Terjime Merkezi boldy. Şeýle hem ýurdumyzda çap edilýän “Biznes reklama” gazeti hem gatnaşdy.
“Açyk gapylar” gününe gelen myhmanlar okuw mekdebinde okadylýan dersler, hünärler bilen içgin tanyşdylar. Okuw mekdebiniň girelge zalynda tanyşdyrylyş sergisi görkezildi. Bu ýerde “Atavatan Türkmenistan” halkara žurnalynyň hem-de “Makul Hyzmat” Terjime Merkeziniň sergisi hem ýaýbaňlandyryldy. Şol ýerde “Atavatan Türkmenistan” halkara žurnalynyň birnäçe çapdan çykan sanlary bilen bir hatarda “Makul Hyzmat” Terjime Merkeziniň hyzmatlarynyň görnüşleri tanyşdyryldy.
“Açyk gapylar” gününiň geçirilmeginiň maksady bu hünär okuw mekdebiniň taryhy, teleradio žurnalistikany, teleradiogepleşikleri taýýarlamagy we alyp barmagy, kino sungatyny hem-de telekinooperatorçylygyň inçe tilsimleriniň öwredilýän hünärleri boýunça gürrüň bermekden we okuw ders sapaklarynyň geçirilişi bilen tanyşdyrmakdan ybaratdyr.
Hormatly Prezidentimiziň Türkmenistanda alyp barýan bilim syýasatynyň esasynda Başlangyç hünär okuw mekdebinde zehinli ýaşlaryň ukyp-başarnyklaryny ýüze çykaryp, telewideniýede, radioda, mahabat işleri şeýle-de kino sungaty üçin ökde hünärmenleri taýýarlamakda uly işler alnyp barylýar. Başlangyç hünär okuw mekdebinde öz işine ussat hünärmenler talyp ýaşlara degişli ugurlardan sapak berýärler.