Ispaniýanyň futbol boýunça milli çempionatynda çempion belli boldy. 4 ýyldan soňra ýene-de “Barselona” topary çempion bolmagy başardy. Şeýlelikde, “Barselona” topary “La Liga” çempionatynda 27-nji çempionlygyny gazandy. Bu ugurda rekord “Real Madrid” toparyna degişlidir. Olaryň çempionlygy 35-ä deňdir.
Hawiniň tälimçiligindäki “Barselona” topary 34-nji tapgyrda “Espanýol” toparyny 4:2 hasabyna utup, 85 utuk bilen çempionatyň tamamlanmagyna 4 tapgyr galanda çempionlygyny yglan etdi.
Soňky gezek katalon topary 2018/19-njy möwsümde çempion bolupdy. Şondan bäri “Real” 2 gezek we “Atletiko” çempion boldy.
Ispan toparynyň tälimçisi Hawi topary bilen 2-nji möhüm kubogyny eýeledi. Ol tälimçi hökmünde ilkinji gezek toparyny çempion etmegi başardy.
Umumylykda, “Barselona” toparynyň kuboklarynyň sany milli we halkara ýaryşlar göz öňünde tutulanda 99-a deňdir. Onuň esasy bäsdeşi “Realyň” kuboklarynyň sany 100-e ýetdi.
“Barselona” toparynyň düzüminde çykyş edýän Robert Lewandowski, Žýul Kunde, Rafinýa, Andreas Kristensen, Ferran Torres, Fransk Kessiz, şol sanda toparyň ýaş futbolçylary Pedri, Gawi, Ansu Fati we Aleks Balde ilkinji gezek çempion bolmagy başardy.
Toparyň tejribeli futbolçysy Serhio Buskets bolsa, “Barselona” topary bilen 9-njy çempionlygyny we 32-nji kubogyny gazandy. Ol şu möwsümiň tamamlanmagy bilen topardan gidýändigini belledi.