Balkanabat şäheriniň gaýrasynda howalanyp oturan Uly Balkan dagynyň etegindäki «Düzmergen» diýen ýaýlada telekeçi Halmämmet Amanmämmedowyň miweli bagy bar.
Türkmenistanyň Halk Maslahatynda kabul edilen «Oba hojalyk pudagynda geçirilýän özgertmeleri has-da kämilleşdirmek hakynda» Karara laýyklykda Uly Balkan dagynyň etegindäki ajaýyp künjekden 22 gektar mes toprakly ýeri miweli baglary ösdürip ýetişdirmek, şonuň ýaly-da ýokary hil ülňülerine doly laýyk gelýän döwrebap ýyladyşhanany gurmak üçin, 99 ýyl möhleti bilen alan hususyýetçi bu ýerde işleri üstünlikli ýola goýýar.
Ol miweli baglaryň her biriniň ylmy esasda ösdürilip ýetişdirilişine hem aýratyn üns berdi. Munuň özi bu döwletli işe taýýarlykly girişmäge uly ýardam berdi.
Başarjaň telekeçiniň häzirki pursatda bu ýaýladaky miweli baglarynyň tutýan meýdany 5 gektara ýetýär. 2016-njy ýylda oturdylan dürli miweli nahallaryň jemi 5 müň 500 sanysy üstümizdäki ýylda öz datly miwelerini bolluk bilen eçilip başlady.
Şu ýylyň tomus möwsüminde şetdaly, erik, alma, armyt, garaly, saraly, ülje, hurma, pisse, beýi ýaly baglardan ýygnalyp, welaýatyň ak bazarlarynda sarp edijilere ýetirilen, ekologiýa taýdan arassalygy, tagamlylygy we ynsan bedenine ýokumlylygy bilen tapawutlanýan miweleriň umumy möçberi 20 tonna ýetipdir. Bu ýerde alma, armyt, şetdaly ýaly miweli daragtlaryň ir, aralyk we giç ýetişýän görnüşleriniň hem bardygyny aýratyn nygtamak gerek. Miweleri ýygnamak işi güýz paslynyň ilkinji aýynda hem dowam etdirilýär. Iň esasy zat bolsa, datly miweleriň ak bazarlarda halkymyza elýeterli nyrhlardan satylýandygydyr.
Zähmetsöýer telekeçi miweli baglaryň tutýan meýdanyny giňeltmegi maksat edinýär. Şu maksat bilen, üstümizdäki ýylyň güýzünde taýýarlanylyp goýlan 7 gektar ýere üzüm çybyklaryny, 5 gektar ýere dürli miweli baglaryň nahallaryny oturtmak göz öňünde tutulýar.
Ýurdumyzda we dünýäde bolup geçýän ykdysadyýete degişli täzeliklerden “habardar” bolmak isleýän bolsaňyz, bu sahypa Siziň üçin!
