Fransiýanyň Pariž şäherinde geçirilen Türkmenistanyň nebitgaz pudagyna daşary ýurt maýa goýumlaryny çekmek boýunça halkara göçme forumynda çykyş eden ” Caspian Logistics Solutions” kompaniýaysnyň wise-prezidenti Rifat Sultan-zade Azerbaýjanyň hususy kompaniýalarynyň Türkmenistanda maýa goýum taslamalaryny durmuşa geçirmäge taýýardygyny belledi. Bu barada “Report.az” internet neşiri habar berýär.
– Häzirki wagtda Türkmenistan halkara hyzmatdaşlygynyň merkezine öwrüldi. Köp ýyllaryň dowamynda Türkmenistan sebitde dürli halkara maksatnamalarynyň öňbaşysy bolup çykyş etdi. Bu hem sebitdäki ykdysady, logistika we howa başlangyçlary üçin durnukly ösüş maksatnamalaryna ýurduň ägirt uly goşandyny kesgitleýär – diýip, Rifat Sultan-zade belläp geçdi.
Ýük daşamalaryň işini kämilleşdirmek babatda sebitiň logistika taslamalary barada belläp geçen Rifat sultan-zade Türkmenistanyň çäklerinden geçýän birnäçe ulag geçelgelerini ösdürmek babatdaky tekliplere garamaga çagyrdy.
Şeýle hem ol sebitiň logistika taslamalaryna maý goýumlary çekmek üçin “Black-Caspian Logistics Fund” ýagny “Gara-Hazar deňzi logistika gaznasy” logistika maýa goýum gaznasyny döretmek ugrunda iş alnyp barylýandygyny belledi.
Mundan başga-da, Rifat Sultan-zade Azerbaýjanyň “AZCHEMCO” kompaniýasynyň türkmen mineral dökünler boýunça önüm öndürijileri bilen, şeýle hem Türkmenistanda suwuk we suwda ereýän dökünleriň önümçiligine maýa goýumlary goýmak babatda hyzmatdaşlyk etmäge gyzyklanma bildirýändigini belledi.
Pariždäki göçme forumyň plenar mejlisi tamamlanandan soňra Türkmenistanyň “Rysgally Zähmet” hususy kärhanasy bilen Azerbaýjanyň “AZCHEMCO” kompaniýasynyň arasynda hyzmatdaşlyk etmek boýunça ähtnama gol çekildi.
Şeýle hem Azerbaýjanyň “Caspian Logistics Solutions” we “AZCHEMCO” kompaniýalary tarapyndan türkmen wekiliýetine azerbaýjan halysy sowgat berildi.
” Caspian Logistics Solutions” kompaniýaysnyň wise-prezidenti Rifat Sultan-zade halynyň hem tükrmen hem-de azerbaýjan halklarynyň gadymy sungatydygyny belläp, iki ýurduň halylarynyň dünýäde uly meşhurlykdan peýdalanýandygyny belledi.
Sowgat berlen haly Azerbaýjanyň “Azerhalça” haly önümçilik kärhanasynyň halyçylary tarapyndan ýörite sargyt bilen dokaldy.