Türkmenistanyň hemişelik Bitaraplygynyň 25 ýyllygy mynasybetli awtomobil sporty boýunça birnäçe ýaryşlar geçirildi. Bu baýramçylyk sport ýaryşlary Türkmenistanyň Senagat pudagynyň işgärleriniň güni bilen utgaşyp gitdi. Türkmenistanyň Içeri işler ministrligi we Sport we ýaşlary syýasaty ministrligi sport ýaryşlaryny gurnaýjy bolup çykyş etdi. Türkmenistanyň Senagat we gurluşyk önümçilik ministrligi bu ýaryşlary hemaýatkäri boldy.
Bu ýaryşlaryň öňüsyrasynda hormatly Prezidentimiz Türkmenistanyň Içeri işler ministrliginiň Aşgabat şäheriniň demirgazygyndaky Awto sport ulag merkezine bardy. Milli Liderimiz bu ýerde täze gelip gowşan sport awtoulaglary bilen gyzyklandy we olaryň birini synagdan geçirdi. Hormatly Prezidentimiz awtoulagy bu gezek hem awtoulaga ýokary derejede erk edip, özüniň ussatlygyny görkezdi.
“GARAGUM-ÝALKYM” RALLI REÝD ÝARYŞY GEÇIRILDI
Şondan soňra milli Liderimiz awtomobil sporty ýaryşlaryna badalga berdi. Ilki bilen Garagum sähralygynda geçirilen ýaryşa “Garagum ýalkymy” alawynyň golaýyndan badalga berildi. Bu ýaryş 100 kilometr aralykda geçirildi.
Oňa 10 topar gatnaşdy. Olaryň arasynda “Türkmenawtoulaglary” agentliginiň “Nissan Patrol” awtoulagy bu aralygy 1 sagat 42 minut 07 sekuntda geçmegi başardy. Içeri işler ministrliginiň “Mini Cooper” ulagy bu aralygy 2 sagat 7 minut 3 sekuntda geçdi.
AWTOULAG ÝARYŞLARY GEÇIRILDI
Soňra Awtoulag sporty merkezinde “Volkicar” kysymly sport ulaglarynda karting, halkalaýyn ýaryş hem-de drift ugry boýunça bäsleşikler geçirildi.
Sport ýaryşlary tamamlanandan soňra baýrak gowşurylyş dabarasy geçirildi. Bu dabarada sport ýaryşlarynyň guramaçysy bolup çykyş eden Türkmenistanyň Içeri işler ministrligi, Sport we ýaşlary syýasaty ministrligi hem-de ýaryşlaryň hemaýatkäri bolup çykyş eden Senagat we gurluşyk önümçilik ministrliginiň ýolbaşçylary çykyş etdi.
Ýaryşda baýrakly orunlary eýelän türgenlere kuboklar hem-de smart-telewizorlar gowşuryldy.
Mälim bolşy ýaly, 2018-nji ýylda ýurdumyzda halkara derejesinde geçirilen “Amul — Hazar” rallisi türkmen türgenleri üçin möhüm ähmiýete eýe bolup, olaryň sport ussatlyklaryny has-da kämilleşdirmegine giň mümkinçilik berdi.