Türkmenistanda täze «Awtoulag kärhanalar birleşigi» açyk görnüşli paýdarlar jemgyýeti dörediler. Bu barada Ministrler Kabinetiniň sanly wideoaragatnaşyk arkaly nobatdaky mejlisinde aýdyldy.
Mejlisde Milli Liderimiz Gurbanguly Berdimuhamedowyň tabşyrygyna laýyklykda, «Aşgabat-Daşoguz» awtomobil ýolunyň ugrunda gurulýan Awtoulag kärhanalar toplumynyň gurluşyk işleri tamamlaýjy tapgyrda alnyp barylýandygy aýdyldy.
Mejlisde şeýle hem, «Türkmenawtoulaglary» agentliginiň edara-kärhanalarynyň işiniň netijeliligini ýokarlandyrmak maksady bilen, Aşgabatdaky ýolagçy awtoulag kärhanasynyň, Awtomobil mekdepleriniň birleşiginiň hem-de «Awtomobil ulag hyzmaty» açyk görnüşli paýdarlar jemgyýetiniň paýly gatnaşygynda «Awtoulag kärhanalar birleşigi» açyk görnüşli paýdarlar jemgyýetini döretmek barada teklip beýan edildi.
Türkmenistanyň Prezidenti degişli Karara gol çekildi. Bu Karara, Berkarar döwletimiziň bagtyýarlyk döwründe milli ykdysadyýetimizi diwersifikasiýa ýoly bilen ösdürmek, ýurdumyzda awtomobil ulag pudagynyň edara-kärhanalarynyň işini has-da kämilleşdirmek we bazar gatnaşyklary üçin amatly şertleri döretmek maksady bilen gol çekildi.
Resminama laýyklykda, «Awtoulag kärhanalar birleşigi» açyk görnüşli paýdarlar jemgyýetini döretmäge esaslandyryjylar hökmünde «Türkmenawtoulaglary» agentliginiň Aşgabatdaky ýolagçy awtoulag kärhanasyna — esaslyk maýadaky paýy 40 göterim we Awtomobil mekdepleriniň birleşigine — esaslyk maýadaky paýy 30 göterim möçberde paýly gatnaşmaga ygtyýar berildi.
Maliýe we ykdysadyýet ministrligine «Awtoulag kärhanalar birleşigi» açyk görnüşli paýdarlar jemgyýetiniň bellenen tertipde döwlet tarapyndan bellige alynmagyny üpjün etmek tabşyryldy.
sport baradaky täzelikleri we seljermeleri okamak üçin Sport sahypamyza geliň
