Türkmenistanyň Garaşsyzlyk güni mynasybetli baýramçylyk çäreleriniň dowamynda Astrahan oblastynyň wise-gubernatory – oblast hökümetiniň başlygy Denis Afanasýew Aşgabatda saparda boldy. «Türkmenistan – biziň strategiki hyzmatdaşymyz we ygtybarly dostumyz. Biz özara hyzmatdaşlygymyza aýratyn üns berýäris» diýip, Denis Afanasýew jemgyýetçilik ulgamyndaky sahypalarynda belläp geçdi.
Saparyň çäklerinde Türkmenistanyň Ministrler Kabinetiniň ulag-aragatnaşyk ulgamyna gözegçilik edýän orunbasary Mämmethan Çakyýew bilen duşuşyk geçirildi. Taraplar hyzmatdaşlygyň esasy ugurlaryny ara alyp maslahatlaşdylar.
Haryt dolanyşygynyň ösmegi üçin logistika merkezi
Duşuşygyň merkezinde Astrahan oblastynda logistika merkezini döretmek meselesi boldy. Sebit eýýäm degişli ýer böleklerini bölüp berdi, taslamany durmuşa geçirmek üçin zerur şertleri döretdi hem-de degişli ylalaşyklara gol çekdi. Häzirki wagtda Astrahan oblasty türkmen tarapynyň tehniki tabşyrygyny garaşýar. Merkeziň açylmagy Russiýa bilen Türkmenistanyň arasyndaky haryt dolanyşygyny ep-esli artdyrmaga, söwda-ykdysady gatnaşyklary berkitmäge mümkinçilik berer.
Deňiz gatnawy we täze mümkinçilikler
Astrahan oblasty iki ýurduň portlarynyň arasynda yzygiderli deňiz gatnawyny ýola goýmakda uly mümkinçilik görýär. Sebit oba hojalyk önümleriniň we senagat harytlarynyň giň görnüşini ibermäge taýýar. Bu taslamanyň durmuşa geçirilmegi ýük daşamalarynyň täze mümkinçiliklerini açar.
Gämi gurluşygy boýunça hyzmatdaşlyk
Geçirilen gepleşiklerde gämi gurluşygy babatynda hyzmatdaşlyk meselesi hem maslahatlaşyldy. Astrahan gämi zawodlary Hazarýaka ýurtlarynyň sargytlaryny üstünlikli ýerine ýetirýär we Türkmenistanyň «Balkan» zawody bilen hyzmatdaşlyga taýýardyr.
Hünärmenleri taýýarlamak
Mämmethan Çakýew, Türkmenistanyň deňiz we gämi gurluşyk kompaniýalary üçin hünärmenleri taýýarlamak hem-de olaryň hünär derejesini ýokarlandyrmakda gyzyklanma bildirýändigini nygtady. Okuw bazasy hökmünde admiral F.M. Apraksiniň adyny göterýän Hazar deňiz we derýa ulaglary instituty, şeýle hem Astrahan oblastynyň beýleki ýokary okuw mekdepleri seredilýär.
Syýahatçylyk we işewürlik üçin göni howa gatnawy
Syýahatçylygy we işewür gatnaşyklary ösdürmek üçin taraplar Astrahan – Türkmenbaşy göni howa gatnawyny ýola goýmak mümkinçiligini maslahatlaşdylar. Astrahan howa menzili bu ugurda «Türkmenhowaýollarynyň» işini üpjün etmek üçin ähli şertleri döretmäge taýýardyr.