Ýurdumyzyň geçen ýylky çempiony “Arkadag” topary bilen kümüş medalynyň eýesi “Ahal” toparlary öňümizdäki möwsümde AFK-nyň Çempionlar ligasy ― 2 bäsleşiginde çykyş ederler.
“Arkadag” topary abraýly ýaryşy toparçalaýyn bäsleşiginden başlasa, onda “Ahal” bu kubokdaky ýoluny saýlama tapgyrdan başlar. “Ahal” toparynyň saýlama tapgyrynda ýeňlen ýagdaýynda, çykyşyny AFK-nyň Çagyryş lihasynyň toparçalaýyn bäsleşiginden dowam etjekdigini bellemek gerek. Futbol çempionatymyzyň geçen möwsümini üçünji orunda tamamlan paýtagtymyzyň “Altyn Asyr” topary halkara möwsümini AFK-nyň Çagyryş ligasynyň toparçalaýyn bäsleşiginden başlar.
Toparlarymyzyň birbada üçüsiniň AFK-nyň Kubok bäsleşiklerinde çykyş etmekleri “Arkadag” toparynyň AFK-nyň Çagyryş ligasyndaky gazanan ýeňşi bilen baglydyr. Arkadag şäheriniň adybir toparynyň abraýly ýaryşda baş baýraga mynasyp bolmagy ýurdumyzyň AFK-nyň reýtingindäki ornunyň ýokarlanmagyna mümkinçilik berdi.
Özümizdäki möwsümde Aziýa yklymynyň abraýly klub bäsleşiklerinde çykyş etjek toparlarymyza üstünlik gazanmaklaryny arzuw edýäris.