Ýurdumyzyň çempiony “Arkadag” toparynyň milli çempionatymyzdaky ýeňişli ýoly halkara arenasynda hem dowam edýär.
Şu gün, 12-nji martda AFK-nyň Çagyryş ligasynyň çärýek finalynyň jogap duşuşygyny öz meýdanynda Hindistanyň “Ist Bengal” topary bilen geçiren “Arkadag” topary özünden garaşylan ýokary derejeli oýny görkezmegi başardy.
Arkadag şäheriniň 10 müň orunlyk stadionynda geçirilen duşuşygyň ilkinji minutlaryndan hüjüm futboluny öňe süren “Arkadag” topary duşuşygyň garşydaşyndan 2:1 hasabynda üstün çykyp, abraýly ýaryşyň ýarym finalyna çykmagy başardy.
Toparymyza ýeňiş getiren toplaryň ikisini hem Altymyrat Annadurdyýew (89, 11 m.j.u.; 90+8) öz atlaryna ýazyrmagy başardy. Garşydaş toparyň goluny oýnuň 2-nji minutynda Messi Bouli geçirdi.
Bu toparlaryň arasynda Hindistanda geçirilen birinji duşuşykda hem “Arkadag” topary ýeňiş gazanmagy başardypdy (1:0).
Ýeri gelende bellesek, “Arkadag” topary ýaryşyň toparçalaýyn tapgyryny hem ynamly geçipdi. «B» toparçasynda çykyş eden toparymyz şonda Maldiw adalarynyň “Maziýa Sports”, Gyrgyz Respublikasynyň “Abdyş-Ata” hem-de ýerli “Al-Arabi” toparlary bilen geçirilen duşuşyklarda netijeli çykyş edipdi.
“Arkadag” toparynyň ýarym finaldaky garşydaşy “Al-Arabi” (Kuweýt) bilen “Al-Sib” (Oman) toparlarynyň arasyndaky duşuşygyň ýeňijisi bolar.
AFK-nyň Çagyryş ligasynyň ýarym final duşuşyklarynyň şu ýylyň 9-njy hem-de 16-njy aprelinde geçirilmegine garaşylýar.