2023-nji ýylyň 21 – 31-nji awgusty aralygynda gümrük edalarynda jogapkär ýolbaşçy wezipeler üçin ätiýaçda duran harby gullukçylar bilen sanly ulgamyň serişdeleriniň ähli mümkinçilikleriniň doly döredilen ýeri bolan Arkadag şäheriniň gümrükhanasynda Türkmenistanyň Döwlet gümrük gullugy tarapyndan ýörite okuw çäresi geçirilýär.
Gullugyň web-sahypasynda habar berlişi ýaly, bu ýörite okuw çäresi gullugyň düzüminde jogapkär wezipelere harby gullukçylary köp taraplaýyn taýýarlamak, täze kabul edilýän kanunçylyk namalary çuňňur düşündirmek hem-de raýatlara edilýän hyzmatyň hil derejelerini ýokarlandyrmakda amala aşyrylmaly işleri düşündirmek maksady bilen guralýar.
Ýörite tassyklanan meýilnama laýyklykda, okuw sapaklary, esasan, tejribeli gümrük işgärleri tarapyndan geçirilýär.
Bu okuw çäresiniň dowamynda geçiriljek sapaklar Gahryman Arkadagymyzyň kitaplarynyň syýasy ähmiýeti, kanunçylyk-hukuk özgertmeleri, Döwlet gümrük gullugynyň işiniň esasy ýörelgeleri, «Döwlet gullukçysynyň etikasy we gulluk özüni alyp barşy hakynda» Türkmenistanyň Kanunynyň ähmiýeti, gümrük edaralarynda iş dolandyryşy guramak, Daşary ykdysady geleşik we olaryň görnüşleri, gümrük edaralaryna tölenýän gümrük tölegleriniň we salgytlaryň degişliligi boýunça hasaplaryň geçirilişi ýaly ýene-de ençeme ugurlary öz içine alýar.
Şeýle okuw çäreleriniň geljekde gümrük edaralarynda ýolbaşçy wezipelere ätiýaçda duran harby gullukçylar bilen geçirilmegi, olaryň hünär taýdan kämil, ukyp-başarnyklarynyň we hukuk sowatlylygynyň has-da ýokary bolmagyna özüniň oňyn täsirini ýetirer.