Argentinanyň paýtagty Buenos-Aýresde ofisiantlaryň arasynda ýaryş geçirildi. Ofisiantlaryň ellerinde gaby bilen iň çalt ofisiant bolmak üçin bäsleşdi.
Argentinada ofisiantlaryň bäsleşigi ýurduň Syýahatçylyk, myhmanhana we gastronomiýa işgärleriniň bileleşigi tarapyndan geçirildi. Ol ýurduň paýtagtynyň esasy köçeleriniň biri bolan Maý şaýolunda gurnaldy.
Bu bäsleşik üçin köçede ulaglaryň hereketi togtadyldy. Ýaryşa gatnaşan ofisiantlar ellerindäki gapda ýerleşdirilen suw, şireli we gazlandyrylan içgileri götermek arkaly 1 kilometr aralygy geçmek üçin bäsleşdiler.
Ýurduň dürli künjeginden gelen ýüzden gowrak ofisiant elindäki gaby gaçyrmazlyk şerti bilen öňdeligi eýelemek ugrunda bäsleşdi.
Ýaryşyň şertleri boýunça oňa gatnaşan erkek, zenan we ýaş toparyna görä ofisiantlaryň arasynda ýeňijiler kesgitlendi. Ýeňijilere kubok, şahadatnama we pul baýragy berildi.