Azerbaýjanyň Şuşa şäherinde Türki medeniýetiň halkara guramasynyň (TÜRKSOÝ) bilen bilelikde “Şuşa – türki dünýäsiniň medeni paýtagty-2023” ýylynyň ýapylyş dabarasy geçirildi. Oňa Türkmenistanyň medeniýet ministri Atageldi Şamyradow hem gatnaşdy.
Azerbaýjanyň döwlet habarlar gullugynyň habar bermegine görä, bu dabarada 2024-nji ýylda türki dünýäsiniň mednei paýtagty hökmünde yglan edilen Änew şäherine bu derejä dabaraly ýagdaýda berildi.
Azerbaýjanyň medeniýet ministri Adil Kerimli Türkmenistanyň medeniýet ministri Atageldi Şamyradowa türki dünýäsiniň medeniýet ministrleriniň hemişelik geňeşiniň başlyklygynyň nyşanyny gowşurdy.
Dabarada çykyş eden Türkmenistanyň medeniýet ministri Atageldi Şamyradow şeýle dabaralaryň türki dünýäsiniň arasyndaky agzybirligi pugtalandyrýandygyny belläp, milli medeniýetleriň wagyz etmegine mümkinçilik döredýändigini mälim etdi. Şeýle hem ol türki döwletleriň arasynda mednei gatnaşyklary ösdürmek üçin giň mümkinçilikleriň bardygyny belläp geçdi.
Dabarada Türkmenistanyň Änew şäheri barada wideofilm görkezildi. Şeýle hem Türkmenistanyň, Azerbaýjanyň we Özbegistanyň medeniýet we sungat ussatlarynyň bilelikdäki konserti geçirildi.
“Türki dünýäsiniň medeni paýtagty” taslamasy 2010-njy ýylda ýola goýuldy. Şonuň netijesinde, her ýyl türki döwletleriň şäherleriniň biri bu derejä mynasyp bolýar.
Häzirki wagta çenli Astana (2012), Eskişehir (2013), Kazan (2014), Merw (2015), Şeki (2016), Turkestan (2017), Kastamonu (2018), Оş (2019), Hywa (2020) we Bursa (2022) “Türki dünýäsiniň medeni paýtagty” derejesine eýe boldy. Şuşa şäheri bu derejä mynasyp bolan 11-nji şäherdir.