2024-2025-nji möwsümiň iň güýçli futbolçysyna gowşurylýan “Altyn pökgi” baýragynyň gowşuryyş dabarasy 22-nji sentýabrda geçiriler. Fransiýanyň “France Football”žurnaly tarapyndan geçirilýän bu dabara Pariž şäherinde Şatle teatrynda guralar.
2024-nji ýylda bu baýraga Angliýanyň “Mançester Siti” toparynyň ispan ýarym goragçysy Rodri mynasyp bolupdy.
“Altyn pökgi” baýragy “France Football” žurnalynyň ozalky baş redaktory Gabriel Ano tarapyndan döredildi. Ol ilkinji gezek 1956-njy ýylda Angliýanyň “Blekpul” toparynyň hüjümçisi Stenli Mettýuza gowşuryldy. Baýragyň ýeňijisi sport žurnalistleri tarapyndan kesgitlendi.
Bu baýraga iň köp argentin ýyldyzy Lionel Messi mynasyp boldy. Messi 8 gezek bu arzyly kubogy alan bolsa, onuň ýaşyl meýdançadaky esasy bäsdeşi Kristiano Ronaldo bolsa 5 gezek bu baýragyň eýesi boldy.