20-nji oktýabrda Türkmenistanyň paýtagty Aşgabat şäherinde MAMA «Ene tebigat» atly halkara sungat sergisiniň açylyş dabarasy geçirildi. Oňa “Ata Watan Media” topary hem gatnaşdy.
Bu çärä Geýdar Aliýew adyndaky gaznanyň wise-prezidenti Leýla Aliýewa, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa, Özbegistan Respublikasynyň Prezidentiniň Administrasiýasynyň ýolbaşçysy Saida Mirziýoýewa, Türkmenistanda akkreditirlenen diplomatik wekilhanalaryňö agzalary we sungat ulgamynyň wekilleri gatnaşdylar.
Açylyş dabarasynda çykyş eden Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa halklaryň arasyndaky gatnaşyklarda sungatyň we tebigaty goramagyň möhüm ornuny nygtady. Ol sungatyň halklaryň medeni taýdan ýakynlaşmagyna ýardam edýändigini, adamlaryň kalbynda gözellige bolan söýgini oýarýandygyny we olary umumadamzat ynsanperwerlik gymmatlyklarynyň daşynda birleşdirýändigini belledi.
«Şu günki serginiň esasy mowzugy — tebigat. Adam bilen tebigatyň arasyndaky sazlaşyk durnukly ösüşiň aýrylmaz şertidir. Tebigata aýawly çemeleşmek, onuň gözelligini we baýlyklaryny geljekki nesiller üçin gorap saklamak her bir adamyň we tutuş jemgyýetiň möhüm wezipesidir» diýip, O. Atabaýewa nygtady.
Geýdar Aliýew gaznasynyň wise-prezidenti Leýla Aliýewa sergide görkezilýän eserler we iki ýurduň umumy ekologiýa meseleleri barada pikirlerini paýlaşdy. Ol sergide dünýäniň 35 ýurdundan 62 suratkeşiň 116 eseriniň görkezilýändigini, şol sanda türkmen ussatlarynyň eserleriniň hem sergide orun alandygyny belledi.
Geýdar Aliýew gaznasynyň wise-prezidenti sergide görkezilýän eserleriň her biriniň tebigatymyzyň gözelligini, güýjüni we näzikligini özboluşly görnüşde açyp görkezýändigini, şeýle hem ony gorap saklamagyň nähili möhümdigini ýene bir gezek ýatladýandygyny nygtady.
Serginiň myhmanlarda ýatdan çykmajak täsirleri galdyryp, olara ylham berjekdigini bellän Leýla Aliýewa şeýle diýdi:
«Azerbaýjan bilen Türkmenistany diňe bir gadymy taryh we medeniýet däl, eýsem, umumy tebigy baýlygymyz bolan Hazar deňzi hem baglanyşdyrýar».
IDEA guramasynyň işi barada durup geçen Leýla Aliýewa bu guramanyň Azerbaýjanda we dünýäde şeýle meseleleri çözmäge gönükdirilen köp sanly taslamalary durmuşa geçirýändigini nygtady.
Soňra myhmanlar sergide görkezilýän eserler bilen tanyşdylar.
Sergide Türkmenistanyň amaly-haşam sungatynyň nusgalary hem görkezilýär. Olaryň arasynda milli saz gurallary, halylar, milli başgaplar, gadymy şaý-sepler, şeýle hem türkmen halkynyň maddy-medeni mirasyny şöhlelendirýän dürli eksponatlar bar.
Belläp geçsek, Azerbaýjany hem goşmak bilen dünýäniň köp sanly ýurtlaryndan suratkeşleri birleşdiren MAMA «Ene tebigat» atly halkara sungat sergisi sungatyň dili arkaly planetamyzy geljekki nesiller üçin gorap saklamaga çagyrýar.
Sergide dürli installyasiýalar, şekillendiriş sungatynyň eserleri, dokma sungatynyň nusgalary we multimediýa eksponatlary arkaly häzirki döwrüň ekologiýa we durmuş meseleleri bilen sazlaşýan wakalar beýan edilýär.