Garaşsyz Döwletleriň Arkalaşygynyň Ykdysady geňeşiniň nobatdaky, 111-nji mejlisini 2026-njy ýylyň 11-nji sentýabrynda Aşgabatda geçirmek meýilleşdirilýär. Duşuşyk Türkmenistanyň GDA-da başlyklyk etmeginiň Konsepsiýasyny durmuşa geçirmek boýunça çäreleriň Meýilnamasyna hem-de Ykdysady geňeşiň şu ýylyň 26-njy iýunynda kabul eden çözgüdine laýyklykda geçiriler.
Gün tertibiniň taslamasy 28 meseläni öz içine alýar. Olaryň ep-esli bölegi soňra GDA-nyň Hökümet Baştutanlarynyň Geňeşiniň garamagyna hödürlener. Mejlise gatnaşyjylar ulag howpsuzlygyny ösdürmegiň strategik meýilnamalaryny, ýokary tehnologiýaly pudaklarda senagat hyzmatdaşlygynyň konsepsiýalaryny, şeýle hem birnäçe maliýe we guramaçylyk başlangyçlaryny ara alyp maslahatlaşarlar.
Öňde boljak çärä taýýarlyk görmek maksady bilen, GDA-nyň Ýerine ýetiriji komitetiniň Baş sekretarynyň orunbasary Ilhom Nematowyň ýolbaşçylygyndaky wekiliýet Aşgabada sapar bilen geldi. Türkmenistanyň Maliýe we ykdysadyýet ministrliginiň ýolbaşçylary bilen geçirilen iş duşuşyklarynyň dowamynda taraplar kadalaşdyryjy resminamalaryň taýýarlyk derejesini, çäreleriň maksatnamasyny hem-de mejlisiň guramaçylyk üpjünçiligini ara alyp maslahatlaşdylar.
Gepleşiklere gatnaşyjylar duşuşygy geçirmek üçin saýlanyp alnan desgalara baryp gördüler. Saparyň jemleri boýunça geljekde hereketleri utgaşdyrmak babatda gazanylan ylalaşyklary berkidýän teswirnama gol çekildi.
Taraplar Ykdysady geňeşiň mejlisiniň Türkmenistanda geçirilmeginiň GDA ýurtlarynyň arasyndaky hyzmatdaşlyk gatnaşyklarynyň ösüşine täze itergi berjekdigine hem-de sebit hyzmatdaşlygynyň möhüm meseleleri boýunça ähmiýetli çözgütleri kabul etmäge mümkinçilik döretjekdigine ynam bildirdiler.