2026-njy ýylyň 5-nji maýynda Ýerewan şäherinde «Yerevan Dialogue 2026» atly wekilçilikli halkara forumy öz işine başlady. Foruma Türkmenistanyň daşary işler ministriniň orunbasary Ahmet Gurbanowyň ýolbaşçylygyndaky Türkmenistanyň wekiliýeti gatnaşýar.
Belläp geçsek, bu foruma Fransiýa Respublikasynyň Prezidenti Emmanuel Makron bilen bir hatarda Ýewropanyň köp sanly döwletinden ýokary derejeli wekiliýetler hem gatnaşýar.
Türkmen wekiliýetiniň ýolbaşçysy öz çykyşynyň dowamynda Türkmenistanyň ulgamy giň göwrümli döwrebaplaşdyrmagyň, energiýa netijeliligini ýokarlandyrmagyň we zyňyndylary yzygiderli azaltmagyň hasabyna energetika pudagynyň binýadyny işjeň berkidýändigini belledi. Ýurduň ykdysady durnuklylygyny we durmuş abadançylygyny saklamak bilen bir hatarda, gaýtadan dikeldilýän energiýa çeşmeleriniň ulanylyşyny tapgyrlaýyn giňeltmäge aýratyn üns berildi.
Türkmenistanda «ýaşyl» energetika geçişi üçin amatly gurşawy kemala getirmek boýunça eýýäm anyk ädimleriň ädilendigi tassyklanyldy.
Pudagyň ekologiýa taýdan kämilleşdirilmegi energetika howpsuzlygyny üpjün etmek, zähmet bazaryny uýgunlaşdyrmak we sebitleri deňölçewli ösdürmek bilen gönüden-göni baglanyşyklydygy nygtaldy. Ilaty bökdençsiz energiýa bilen üpjün etmek, täze ugurlar boýunça hünärmenleri taýýarlamak we çekilen maýa goýumlaryndan gelýän ähli artykmaçlyklaryň ähli jemgyýetler üçin deň elýeterliligini üpjün etmek esasy ileri tutulýan ugurlar hökmünde kesgitlendi.
Çykyşda milli meýilnamalary amala aşyrmakda netijeli halkara hyzmatdaşlygyň ähmiýetine aýratyn üns çekildi. BMG we halkara maliýe institutlary ýaly abraýly hyzmatdaşlar bilen ýakyndan özara gatnaşyklaryň daşary goldawyň netijeliliginiň aýdyň mysalydygy bellenildi.
Forumyň işi dowam edýär.