Russiýa bilen Saud Arabystany ähli görnüşli pasportlaryň — daşary ýurt, diplomatik we gulluk pasportlarynyň eýeleri üçin wiza talaplaryny özara ýatyrmak barada hökümetara ylalaşyga gol çekdiler. Bu çäre Er-Rýadda geçirilen Russiýa-Saud Arabystany Işewürlik forumynyň çäklerinde boldy. Russiýa tarapyndan dabara wise-premýer Aleksandr Nowak gatnaşdy.
Resminama laýyklykda, iki ýurduň raýatlary hereket edýän pasportuny görkezip, hyzmatdaş döwletiň çägine bir ýylyň dowamynda 90 güne çenli wizasyz girip we şol ýerde galyp bilerler.
Mundan ozal Russiýanyň hökümeti bu taslamany noýabr aýynda makullapdy. Şu wagta çenli Russiýanyň raýatlary Saud Arabystanyna girmek üçin onlaýn ýa-da gelen wagtynda resmileşdirip bolýan wizany talap edipdi, bu hem ýurtda 90 güne çenli galmaga mümkinçilik berýärdi.
Wiza ylalaşygyndan başga-da, taraplar howanyň üýtgemegi we pes uglerodly ösüş meseleleri boýunça özara düşünişmek hakynda ähtnama gol çekdiler, şeýle hem arhiw ulgamynda hyzmatdaşlyk etmek barada ylalaşdylar.
Bu resminamalar Saud Arabystanynyň paýtagtynda geçirilýän Söwda-ykdysady we ylmy-tehniki hyzmatdaşlyk boýunça rus-saud hökümetara toparynyň çäreleriniň çäklerinde gol çekildi.