“Vestiabad” saýtynyň türkmen, türk we rus dillerinde habar bermegine görä, Türkmenistanyň Garaşsyzlygynyň 34 ýyllygyna we hemişelik Bitaraplygynyň 30 ýyllygyna gabatlanyp, “Makul Iňlisçe-Türkmençe sözlügi” Amerikanyň Birleşen Ştatlarynda neşir edildi we häzirki wagtda dünýä meşhur platforma “Amazon” arkaly satuwa çykaryldy.
Täze sözlükde 16 500 sany iňlisçe söz we olaryň türkmen dilindäki terjimeleri ýerleşdirildi. Mundan başga-da, ol diňe adaty sözlük bilen çäklenmän, hukuk, ykdysadyýet, lukmançylyk, IT, emeli intellekt we sport ýaly ýöriteleşdirilen ugurlardaky terminleri hem öz içine alýar.
Maksat we awtorlyk topary
Vestiabad saýtynyň habarynda bellenilişine görä, neşiriň awtorlyk toparyna hukuk ylymlarynyň doktory Döwran Orazgylyjow ýolbaşçylyk edýär. Bu eser giň okyjy gatlagy — okuwçylar, talyplar, terjimeçiler, diplomatlar, hünärmenler hem-de halkara gatnaşyklary bilen meşgullanýan şahslar üçin niýetlenendir.
Halkara ýokary baha
Bütindünýä ekspertler jemgyýeti sözlügiň ähmiýetini ýokary baha berdi.
- S. Frederik Starr (Amerikanyň Daşary Syýasat Geňeşinde Ýewraziýa boýunça tapawutlanan alym, Johns Hopkins uniwersitetiniň professory) ony “diller we medeniýetler arasyndaky köpri” diýip häsiýetlendirdi we türkmen diliniň dünýä sahnasynda ornuny has-da berkitmäge mümkinçilik döredýändigini belledi.
- Erik Stýuart (ABŞ–Türkmenistan işewürlik geňeşiniň ýerine ýetiriji direktory) sözlügiň ýurtlaryň arasyndaky söwda-ykdysady hyzmatdaşlygy ösdürmäge we gatnaşyklary täze ugurlara götermäge goşant goşjakdygyny nygtady.