Ministrler Kabinetiniň Başlygynyň orunbasary B.Seýidowa paýtagtymyzda geçirilmegi meýilleşdirilýän festiwallar barada hasabat berdi.
Bellenilişi ýaly, şu ýylyň 19–21-nji maýy aralygynda milli gymmatlyklarymyzy giňden wagyz etmek, medeniýetleri özara baýlaşdyrmak maksady bilen «Parahatçylyk sazy» atly halkara festiwaly, şeýle hem 29–31-nji maýy aralygynda «Parahatçylyk sazy, dostluk, doganlyk sazy» atly aýdym-sazly festiwaly geçiriler.
Festiwallaryň çäklerinde konsertleri, döredijilik duşuşyklaryny we ussatlyk sapaklaryny geçirmek, şeýle hem myhmanlaryň paýtagtymyzyň medeni ojaklaryna we beýleki gözel ýerlerine baryp görmekleri göz öňünde tutulýar.
Şunuň bilen baglylykda, döwlet Baştutanymyzyň garamagyna degişli teklip hödürlenildi.
Hormatly Prezidentimiz Serdar Berdimuhamedow hasabaty diňläp, ýurdumyzda «Halkara parahatçylyk we ynanyşmak» ýyly bilen bagly halkara derejesindäki çäreleriň yzygiderli geçirilýändigini aýtdy.
Şunuň bilen baglylykda, döwlet Baştutanymyz wise-premýere «Parahatçylyk sazy» atly halkara festiwalyna, şeýle hem ýaşlar simfoniki orkestriniň we birleşen çagalar horunyň «Parahatçylyk sazy, dostluk, doganlyk sazy» atly aýdym-sazly festiwalyna gowy taýýarlyk görmegi we olary ýokary guramaçylyk derejesinde geçirmegi tabşyrdy.