Türkiýäniň “Çalık Enerji” kompaniýasy «Türkmenistanyň gurluşyk, senagat, himiýa we energetika pudaklarynyň ösüşi» atly halkara maslahatynyň we sergisiniň (CIET 2026) baş hyzmatdaşy hökmünde çykyş eder. Çäre 2026-njy ýylyň 3–5-nji noýabry aralygynda Aşgabat şäherindäki Türkmenistanyň Söwda-senagat edarasynda geçiriler. Ol döwlet edaralarynyň, halkara işewürlik jemgyýetçiliginiň, maýadarlaryň, maliýe institutlarynyň we tehnologiýa üpjün edijileriniň wekillerini bir ýere jemlär.
“Çalık Holding” kompaniýalar toparynyň düzümine girýän “Çalık Enerji” energetika taslamalaryny taslamak, enjamlary satyn almak we elektrik stansiýalaryny gurmak ýaly işleri öz içine alýan taslamalary doly taýýar görnüşde durmuşa geçirmäge ýöriteleşendir. Kompaniýanyň işi elektrik energiýasyny geçirmek we paýlamak, şeýle hem gaýtadan dikeldilýän energiýa çeşmelerini ösdürmek ugurlaryny hem öz içine alýar. “Çalık Enerji” kompaniýasynyň taslamalary Merkezi Aziýada, Ýewropada, Ýakyn Gündogarda we Afrikada amala aşyrylýar.
Türkmenistan bilen hyzmatdaşlyk kompaniýanyň işinde möhüm orun eýeleýär. Durmuşa geçirilen iri taslamalaryň biri kuwwaty 1 574 MWt bolan «Mary-3» bug-gaz elektrik stansiýasydyr. Onuň açylyş dabarasy 2018-nji ýylyň sentýabrynda geçirildi. Bu desga Türkmenistanda utgaşykly aýlaw esasynda işleýän ilkinji elektrik stansiýasy bolup, ýurduň milli elektroenergetika pudagynyň ösüşinde möhüm tapgyra öwrüldi.
Hyzmatdaşlygyň ýene bir ugry Balkan welaýatynda täze elektrik energiýasyny öndüriji kuwwatlyklary döretmek bilen baglanyşyklydyr. 2023-nji ýylyň oktýabrynda «Türkmenenergo» döwlet elektroenergetika korporasiýasyna “Çalık Enerji” kompaniýasy bilen Türkmenbaşy etrabynda kuwwaty 1 574 MWt bolan bug-gaz elektrik stansiýasyny, şeýle hem ony ýurduň energetika ulgamyna birikdirmek üçin elektrik geçiriji ulgamlary gurmak barada şertnama baglaşmaga ygtyýar berýän karar kabul edildi.
Kompaniýanyň energetika desgalaryny gurmak we elektrik torlarynyň infrastrukturasyny ösdürmek babatyndaky tejribesi CIET 2026 forumynyň esasy ugurlary bilen gönüden-göni baglanyşyklydyr. Forum senagat ösüşi, döwrebap gurluşyk pudagy, energetika, himiýa senagaty, infrastruktura we maýa goýumlary çekmek meselelerine bagyşlanýar. Onuň gün tertibinde öňdebaryjy tehnologiýalary ornaşdyrmak we halkara amaly hyzmatdaşlygy ösdürmek aýratyn orun eýeleýär.
CIET 2026 gatnaşyjylara inženerçilik we dolandyryş tejribelerini alyşmak, geljegi uly taslamalary ara alyp maslahatlaşmak hem-de işewürlik gatnaşyklaryny ýola goýmak üçin mümkinçilik döreder. Çalık Enerji kompaniýasynyň baş hyzmatdaş hökmünde gatnaşmagy Türkmenistanda we beýleki ýurtlarda iri energetika taslamalaryny durmuşa geçirmek boýunça toplan tejribesi bilen forumyň mazmunyny baýlaşdyrar.
Çäre we oňa gatnaşmak üçin hasaba alyş barada giňişleýin maglumat CIET 2026-nyň resmi internet sahypasynda elýeterlidir: ciet-turkmenistan.com.