2026-njy ýylyň 6–10-njy noýabry aralygynda Türkiýe Respublikasynyň Antalýa welaýatynyň Alanýa şäherinde VI Bütindünýä media duşuşygy geçiriler. Bu halkara çärä Türkmenistanyň wekili, hukuk ylymlarynyň doktory, «Ata Watan Media» toparynyň esaslandyryjysy we baş redaktory Dr. Döwran Orazgylyjow hem gatnaşar.
Bütindünýä žurnalistler geňeşi (Küresel Gazeteciler Konseyi – KGK) tarapyndan guralýan halkara duşuşyk dünýäniň dürli ýurtlaryndan žurnalistleri, köpçülikleýin habar beriş serişdeleriniň ýolbaşçylaryny we media pudagynyň hünärmenlerini bir ýere jemlär.
Bütindünýä žurnalistler geňeşi Türkiýe Respublikasynyň Prezidenti Rejep Taýyp Ärdoganyň 2019-njy ýylyň 14-nji oktýabryndaky 1660 belgili karary esasynda halkara birleşik derejesinde döredildi. Merkezi Ankarada ýerleşýän bu guramanyň esaslandyryjy başlygy belli türk žurnalisti Mehmet Ali Dimdir.
Geňeş halkara žurnalistika hyzmatdaşlygyny ösdürmek, dürli ýurtlaryň köpçülikleýin habar beriş serişdeleriniň arasynda gatnaşyklary berkitmek, tejribe alyşmak we media diplomatiýasyny ösdürmek ugrunda iş alyp barýar.
2026-njy ýylyň iýul aýyndaky maglumatlara görä, guramanyň dünýäniň 84 ýurdunda we Türkiýäniň 81 welaýatynda wekilleri bar.
Bäş gün dowam etjek halkara duşuşygyň çäklerinde häzirki zaman žurnalistikasynyň ösüşi, halkara media hyzmatdaşlygy, sanly tehnologiýalar, maglumat alyşmak we žurnalistleriň hünär gatnaşyklary bilen bagly meseleleriň ara alnyp maslahatlaşylmagyna garaşylýar.
Türkmenistanyň wekili Dr. Döwran Orazgylyjow hem halkara duşuşyga gatnaşyp, dürli ýurtlaryň media wekilleri bilen özara pikir alyşar.
Dr. Döwran Orazgylyjow Bütindünýä žurnalistler geňeşiniň Türkmenistandaky wekili bolup, halkara media hyzmatdaşlygyny ösdürmek, žurnalistikada emeli aň tehnologiýalarynyň ulanylmagy, jogapkärçilikli žurnalistika we «Makul emeli aň» düşünjesi bilen bagly meseleler boýunça iş alyp barýar.
Ol mundan ozal hem Bütindünýä žurnalistler geňeşi tarapyndan geçirilen halkara media duşuşyklaryna gatnaşypdy.
Alanýada geçiriljek VI Bütindünýä media duşuşygy dürli ýurtlaryň žurnalistleriniň arasynda täze hyzmatdaşlyk mümkinçiliklerini döretmäge, özara tejribe alyşmaga we halkara media gatnaşyklaryny has-da ösdürmäge ýardam eder.