“Demirýollary” açyk görnüşli paýdarlar jemgyýeti ilatymyza berýän hyzmatlarynyň hilini kämilleşdirmek, pudagyň maddy binýadyny berkitmek, häzirki zaman ülňülerine laýyklykda hyzmatlary ýola goýmak maksady bilen möhüm wezipeleri amala aşyrýar.
“Demirýollary” AGPJ ýolagçylar üçin onlaýn bilet hyzmatyny ýola goýdy. Bu jemgyýetiň resmi saýtynda ýerleşdirilen habara görä, mundan beýläk, 15 gün öňünden otly peteklerini onlaýn satyn almak mümkinçiligi döredildi.
Bu barada “Demirýollary” AGPJ-niň resmi saýtynda ýerleşdirilen bildirişde şeýle diýilýär:
– Hormatly ýolagçylar, 2022-nji ýylyň dekabr aýynyň 16-yndan otly petekleri 15 gün öňünden onlaýn görnüşde satuwa goýulýandygyny “Demirýollary” açyk görnüşli paýdarlar jemgyýeti Size habar berýär.
Ýolagçylar öz akylly telefonlaryna gurnalan “Demirýollary” AGPJ programmasynyň kömegi ýa-da railway.gov.tm internet saýtyna girmek arkaly syýahat etmek isleýän wagtynda, şeýle hem syýahat etmek isleýän ugruna elektron biletleri satyn alyp bilerler. Biletleriň tölegini “Altyn Asyr” töleg kartlary arkaly amala aşyrmak göz öňünde tutulandyr.