YHG-nyň Daşary işler ministrleriniň Geňeşiniň 48-nji mejlisiniň çäklerinde Türkmenistanyň daşary syýasat edarasynyň ýolbaşçysy Raşid Meredow ikitaraplaýyn duşuşyklaryň birnäçesini geçirdi.
Hususan hem, Türkmenistanyň Daşary işler ministriniň w.w.ý.ý. R.Meredowyň Gyrgyz Respublikasynyň Daşary işler ministri R.Kazakbaýew bilen gepleşikleri geçirildi.
Söhbetdeşligiň çäklerinde ministrler syýasy-diplomatik, söwda-ykdysady we medeni-ynsanperwer gatnaşyklaryň ähli ugry boýunça ikitaraplaýyn türkmen-gyrgyz gatnaşyklarynyň uzakmöhletleýin esasda ösdürilmegi üçin bar bolan ägirt uly mümkinçilikleriň ähmiýetini belläp geçdiler.
Şeýle hem, şol gün Türkmenistanyň Daşary işler ministriniň w.w.ý.ý. R.Meredowyň Türkiýe Respublikasynyň Daşary işler ministri M.Çawuşoglu bilen duşuşygy geçirildi.
Diplomatlar Türkmenistanyň we Türkiýäniň syýasy-diplomatik gatnaşyklarynyň netijeliligini belläp geçdiler. Yzygiderli esasda geçirilýän ýokary derejeli duşuşyklar özara gyzyklanma bildirilýän ugurlaryň ählisi boýunça türkmen-türk özarahereketleriniň ösdürilmegine itergi berýär.
22-nji martda Türkmenistanyň Daşary işler ministriniň w.w.ý.ý. R.Meredowyň Saud Arabystany Patyşalygynyň Daşary işler ministri Faýsal Bin Farhan Al-Saud bilen ikitaraplaýyn gepleşikleri geçirildi.
Taraplar syýasy, söwda-ykdysady we medeni-ynsanperwer ulgamlaryndaky türkmen-saud gatnaşyklarynyň gün tertibiniň meseleleriniň giň toplumyna seredip geçdiler.
Şu nukdaýnazardan, döwletara gatnaşyklarynyň oňyn depgine eýedigi bellenildi hem-de ýokary derejelerdäki gatnaşyklaryň has hem işjeňleşdirilmeginiň zerurlygy nygtaldy.
PAKISTANYŇ DAŞARY IŞLER MINISTRI BILEN DUŞUŞYK
Türkmenistanyň Daşary işler ministriniň w.w.ý.ý. Raşid Meredow Yslamabatda Pakistan Yslam Respublikasynyň Daşary işler ministri Şah Mahmud Kureşi bilen ikitaraplaýyn duşuşygy geçirdi. Onuň dowamynda ministrler ikitaraplaýyn gatnaşyklaryň häzirki ýagdaýyny we ony ösdürmegiň mümkinçiliklerini ara alyp maslahatlaşdylar.
R.Meredow Pakistan Yslam Respublikasy bilen gatnaşyklaryň Türkmenistanyň daşary syýasatynyň ileri tutulýan ugurlarynyň biri bolup durýandygyny belledi. Pakistan Türkmenistan bilen diplomatik gatnaşyklaryny ýola goýan ilkinji döwletleriň biri bolup (1992-nji ýylyň 9-njy maýy), Türkmenistanyň Bitaraplygyny hem işjeň goldady.
Türkmenistanyň daşary syýasat edarasynyň ýolbaşçysy Pakistan bilen söwda-ykdysady gatnaşyklaryň mundan beýläk hem ösdürilmeginiň wajypdygyny nygtady we bu ugurda Bilelikdäki hökümetara türkmen-pakistan toparynyň işini güýçlendirmegiň möhümdigini belläp, 2022-nji ýylda Yslamabatda nobatdaky mejlisini geçirmegi teklip etdi.
Diplomatlar bilelikdäki iri taslamalaryň, şol sanda TOPH gaz geçirijisiniň, TOP elektrik geçirijisiniň we optiki-süýmli aragatnaşyk ulgamynyň taslamalarynyň durmuşa geçirilişini jikme-jik ara alyp maslahatlaşdylar.
YHG-NYŇ BAŞ SEKRETARY BILEN DUŞUŞYK
Yslam Hyzmatdaşlyk Guramasynyň Daşary işler ministrleriniň Geňeşiniň mejlisine gatnaşmagynyň çäklerinde, Türkmenistanyň Daşary işler ministriniň w.ý.ý. Raşid Meredow Yslam Hyzmatdaşlyk Guramasynyň Baş sekretary Hisseýn Brahim Taha bilen duşuşdy.
Gepleşikleriň başynda, R.Meredow Baş sekretary bu ýokary we jogapkärli wezipä saýlanmagy bilen gutlady hem-de Türkmenistanyň Guramada öz agzalygyna möhüm ähmiýet berýändigini nygtady.
Şeýle hem Baş sekretara, şu ýylyň 12-nji martynda geçirilen, Türkmenistanyň Prezidentiniň saýlawlarynyň netijeleri barada maglumat berildi. Yslam Hyzmatdaşlyk Guramasynyň ýolbaşçysyna geçirilen saýlawlara synçylar toparyny iberendigi üçin minnetdarlyk bildirildi.
Öz gezeginde, Yslam Hyzmatdaşlyk Guramasynyň Baş sekretary YHG-nyň agza-döwletleriniň ählisiniň musulman ymmatynyň ýüzbe-ýüz bolýan dürli meseleleriniň çözülmegi üçin ähli tagallalaryny birleşdirýändiklerini belläp geçdi.
Duşuşygyň dowamynda Türkmenistanyň YHG-nyň işine gatnaşmagy bilen bagly meseleler hem ara alnyp maslahatlaşyldy.
Türkmenistan Yslam Hyzmatdaşlyk Guramasynyň mejlisine gatnaşýar