Azerbaýjanyň “Sabah” futbol topary döredileninden bary-ýogy 9 ýyl soň, taryhynda ilkinji gezek UEFA Çempionlar ligasynyň esasy tapgyryna çykdy.
Geçen möwsümde Azerbaýjanyň 1-nji Futbol ligasynyň (Premýer-liga) çempiony bolan “Sabah” topary pleý-off tapgyrynda Ysraýylyň “HB Sheva” toparyny ýeňip, «Ägirtler ligasynyň» liga tapgyryna gatnaşmaga hukuk gazandy.
“Sabah” topary Ysraýyl toparyna garşy myhmançylykda geçirilen ilkinji duşuşykda 2:1 hasabynda ýeňildi. Bakuwda geçirilen jogap duşuşygynda bolsa 90+4-nji minutda geçiren goly bilen esasy wagty 3:2 hasabynda öňde tamamlap, duşuşygy goşmaça wagta geçirdi. Goşmaça wagtda 9 oýunçy bilen galan “HB Sheva” toparynyň derwezesinden ýene 2 gol geçiren Sabah, duşuşygy 5:2 hasabynda ýeňiş bilen tamamlady we liga tapgyryna çykdy.
Litwaly tälimçi Waldas Dambrauskasyň ýolbaşçylygyndaky Azerbaýjan wekili liga tapgyryna çykmazdan ozal 4 tapgyrdan geçdi. Şýlelikde, “Sabah” topary “Garabag” toparyndan soňra UEFA Çempionlar ligasynda çykyş etmäge hukuk gazanan Azerbaýjanyň ikinji wekili boldy.
1 liga çempionlygy, 2 Azerbaýjan kubogy
“Sabah” topary geçen möwsüm Azerbaýjanyň 1-nji Futbol ligasyny çempion hökmünde tamamlady, şeýle hem soňky iki möwsümde Azerbaýjan kubogyny gazandy.
Azerbaýjan wekili 9 ýyllyk taryhynda jemi 3 kubok gazandy: 1 liga çempionlygy we 2 Azerbaýjan kubogy.
Ilham Aliýewden gutlag
Azerbaýjanyň Prezidenti Ilham Aliýew “Sabah” toparyny UEFA Çempionlar ligasynyň liga tapgyryna çykmagy mynasybetli gutlap, şeýle diýdi:
«Täze döredilen toparyň şeýle gysga wagtyň içinde şeýle uly üstünlige ýetmegi aýratyn şatlygyň we buýsanjyň çeşmesidir. Klublarymyzyň dünýäniň iň güýçli klub ýaryşynyň esasy tapgyrynda yzly-yzyna ikinji gezek çykyş etmäge hukuk gazanmagy, Azerbaýjanyň ähli ugurlarda gazanan ösüşiniň we ýurdumyzyň sport döwleti hökmünde eýeleýän ornunyň aýdyň görkezijisidir. “Sabah” klubyna öňümizdäki duşuşyklarda täze ýeňişleri we üstünlikleri arzuw edýärin.»