Angliýanyň “Liwerpul” topary bilen uly üstünlikler gazanan german hünärmen Ýurgen Klopp “Red Bull” kompaniýasynyň futbol amallaryna ýolbaşçylyk eder. Bu barada “Sky Sports” neşiri habar berýär.
Tejribeli hünärmen 2025-nji ýylyň 1-nji ýanwarynda täze wezipesine girişer. Klopp “Red Bull” kompaniýasynyň Germaniýanyň “Leýpsig”, Awstriýanyň “Zalsburg” we Amerikanyň “Nýu-Ýork” toparlaryna maslahatlaryny berer.
Şeýle hem şertnamada ony wagtyndan öň ýatyrmak maddasyna hem orun berildi. Eger Klopp Germaniýanyň milli ýygyndysynyň baş tälimçisi wezipesine saýlanan halatynda bu wezipesini tabşyrar.
2015-2024-nji ýyllar aralygynda “Liwerpul” toparyna tälim beren Klopp bu topar bilen Angliýanyň çempiony boldy, ýurduň Kubogyny we Superkubogyny gazandy, Çempionlar ligasynyň we UEFA-nyň Superkubogyny eýeledi.