Şu gün Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçdi. Onda ýurdumyzyň halk hojalygynyň ähli pudaklarynda şu ýylyň ýanwar-noýabr aýlarynda amala aşyrylan işleriň netijelerine garaldy.
“Watan” habarlar gepleşiginde bellenilip geçilişi ýaly, Ministrler Kabinetiniň Başlygynyň orunbasary, daşary işler ministri Raşid Meredow şu ýylyň 11 aýynda ýurdumyzyň daşary syýasat ugry boýunça amala aşyrylan işler barada hasabat berdi.
Hasabatdan görnüşi ýaly, şu ýylyň başyndan bäri Türkmenistanyň Prezidenti Hytaý Halk Respublikasyna, Bahreýn Patyşalygyna, Azerbaýjan Respublikasyna, Katar Döwletine, Beýik Britaniýa, Russiýa Federasiýasyna, Täjigistan Respublikasyna, Türkiýe Respublikasyna, Saud Arabystany Patyşalygyna, Wengriýa, Amerikanyň Birleşen Ştatlaryna, Gyrgyz Respublikasyna, Özbegistan Respublikasyna we Birleşen Arap Emirliklerine döwlet, resmi we iş saparlaryny amala aşyrdy.
Hormatly Prezidentimiz birnäçe döwletleriň ýolbaşçylary bilen söhbetdeşlikleri geçirdi. Hasabat döwründe dürli derejede, şol sanda sanly ulgam arkaly duşuşyklar we gepleşikler geçirildi. Resminamalaryň 250-sine gol çekildi. Bular Türkmenistanyň halkara hyzmatdaşlygynyň şertnamalaýyn-hukuk binýadynyň üstüni ýetirdi.