Türkmenistan 14.03.2022-nji ýylda Ukrainada galan raýatlarynyň nobatdaky tapgyryny ýurda getirdi. Bu uçar gatnawynyň amala aşyryljakdygyny ozal habar beripdik.
Düýn irden Warşawa-Türkmenbaşy aralygyna uçuşy amala aşyran “Türkmenhowaýollary” agentliginiň “Boeing” kysymly uçarynda, Ukrainada dowam edýän çylşyrymly ýagdaýlar sebäpli Polşa geçen raýatlar Türkmenistana guramaçylykly getirildi. Has takygy, diplomatik gulluklaryň sazlaşykly işlemegi netijesinde, TUA-3271 ýörite gatnawda gelen Türkmenistanyň 251 sany raýaty Türkmenbaşynyň halkara howa menzilinde mähirli garşy alyndy. Olaryň ýurdumyza gelmegi bilen bagly ähli hyzmatlar döwletiň hasabyna amala aşyrylyp, rahat we howpsuz şertlerde ýurda dolanmaklary üçin zerur bolan ähli mümkinçilikler döredildi. Agzalan raýatlaryň arasynda ähli welaýatlardan ýaşaýjylar bolup, olaryň esasy bölegini talyplar düzýär. Ýurda getirilen raýatlar degişli tertipde karantin gözegçiligini geçenden soňra maşgalalaryna gowşar.
Adam hakda aladany ilkinji orunda goýýan Türkmenistan “Döwlet adam üçindir” diýen şygary iş ýüzünde ýene-de bir gezek subut etdi.
Mälim bolşy ýaly, 10.03.2022-nji ýylda ýörite gatnaw bilen Rumyniýadan 282 sany Türkmenistanyň raýatlary getirildi.