Russiýa Federasiýasynyň Tatarystan Respublikasyna iş saparynyň ikinji gününde hormatly Prezidentimiz Serdar Berdimuhamedow Kazan şäherinde ilkinji gezek giňişleýin düzümde geçirilýän XVI BRIKS Sammitine hormatly myhman hökmünde gatnaşdy.
Türkmenistanyň Prezidenti saparyň çäklerinde Tatarystan Respublikasynyň Baştutany Rustam Minnihanow bilen duşuşdy. Bu barada Tatarystan Respublikasynyň Baştutanynyň metbugat gullugy habar berýär.
Tatarystanyň Baştutany hormatly Prezidentimize türkmen halkynyň Milli Lideriniň binýadyny tutan dost-doganlyk gatnaşyklaryny dowam etdirýändigi, şeýle hem özara hyzmatdaşlygy giňletmek ugrunda tagalla edýändigi üçin hoşallyk bildirdi.
– Biziň hyzmatdaşlygymyzyň baý taryhy bar. Ähli ugurlarda ulgamlaýyn işler alnyp barylýar. Biziň kompaniýalarymyzyň gatnaşýan taslamalary oňat netijeler berýär – diýip, Rustam Minnihanow belledi.
Türkmenistanyň Prezidenti Kazanda görkezilen myhmansöýerlik üçin minnetdarlyk bildirip, “Tatarystan Respublikasy okgunly ösýär we şeýle möhüm sammitleriň geçirilýän ýerine öwrüldi” diýip belledi.
Duşuşygyň ahyrynda Tatarystan Respublikasynyň Baştutany Rustam Minnihanow Türkmenistanyň Prezidentini “Dostluk” (“Duslyk”) ordeni sylaglady. Hormatly Prezidentimiz bu baýragyň döwletara hyzmatdaşlygynyň nyşanyna öwrüljekdigini belledi.